Ekonomia greke, në formë – Pret rritje me 2.8% vitin e ardhshëm. Do të ulen më tej taksat
Greqia pret një rritje të fortë ekonomike në vitin e ardhshëm, sipas Ministrit të Financave Christos Staikouras, i cili premtoi ulje të mëtejshme tatimore dhe më shumë investime për 2020. Greqia doli nga programi ndërkombëtar i ndihmave financiare në vitin 2018, pas një krize të borxhit që fshiu thuajse 25% të ekonomisë.
Progresi fiskal i vendit monitorohet ende nga huadhënësit, që janë Bashkimi Europian dhe Fondi Monetar Ndërkombëtar. “Greqia po kthehet në normalitet dhe kjo është e dukshme brenda dhe jashtë vendit”, tha ministri i Financave. Athina zyrtare pret një rritje ekonomike prej 2% në vitin 2019 dhe 2.8% në vitin e ardhshëm, normë sipër mesatares së Eurozonës.
Qeveria konservatore që mori pushtetin në Korrik, shpreson të tërheqë investime të huaja për të përforcuar rimëkëmbjen ekonomike. Guvernatori i bankës së Greqisë, Yannis Stournaras, tha se pavarësisht kushteve ekonomike, Greqia pritet të arrijë një normë të rritjes prej 2.4-2.5% në vitin e ardhshëm, ku ekonomia e zonës euro projektohet në rreth 1%.
Staikouras tha se këtë javë do të votohet një ligj në parlament që ul taksën korporative në 24% nga 28% dhe taksën për fitimin e pashpërndarë në 5% nga 10%. Këtë muaj, qeveria planifikon të shpërndajë një divident social ndaj thuajse 200,000 familjeve greke, për rrjedhojë të performances së mirë fiskale.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.