Ekonomia kineze nis rimëkëmbjen / Rritet me 3.2% në tremujorin e dytë, pas tkurrjes me 6.8% në fillim të vitit

Ekonomia kineze i është rikthyer rritjes në tremujorin e dytë, pas një rënieje të mprehtë në fillim të vitit. Megjithatë, konsumi i brendshëm dhe investimet kanë qëndruar të dobëta ndërkohë që kriza e koronavirusit vuri në dukje nevojën e më shumë stimujve ekonomikë për të nxitur rimëkëmbjen.   Produkti i Brendshëm Bruto u rrit me 3.2% në tremujorin e dytë, sipas zyrës Kombëtarë të Statistikave, sipër projeksioneve për 2.5% rritje, ndërkohë që masat e karantinës u lehtësuan dhe poltikëbërësit shtuan stimujt për të luftuar  krizën e pandemisë.  Kjo përbën ende rritjen më të dobët ekonomike  në historik dhe ndjek një rënie me 6.8% në tremujorin e parë,  që ishte tkurrja më e madhe që kur nisën regjistrimet e të dhënave në vitin 1992.   Në gjysmën e parë të vitit, ekonomia u tkurr me 1.6% me bazë vjetore, duke treguar ndikimin e gjerë të krizës.  Me bazë tremujore, Produkti i Brendshëm Bruto u rrit me 11.5% në periudhën Prill-Qershor, duke ndjekur një rënie me 10% në tremujorin e mëparshëm.  Ekonomia kineze, e para që u godit nga pandemia e koronavirusit, është rimëkëmbur gradualisht në 2 muajt e fundit.  Megjithatë, rimëkëmbja nga kriza e virusit ka qenë e pabarabartë.  Autoritetet presin gjerësisht të vazhdojnë mbështetjen politike në gjysmën e dytë të vitit, për të nxitur ekonominë, pavarësisht shqetësimeve mbi rritjen e borxhit.  Qeveria ka prezantuar shumë masa, përfshirë shtimin e shpenzimeve, lehtësime tatimore, reduktimin e interesave për kreditë si dhe kërkesave të detyrueshme të bankave, për të rimëkëmbur ekonominë nga goditja dhe për të mbështetur punësimin.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.