Ekonomia, në moment delikat – Lagarde: Ekzistojnë pasiguri. Eurozona duhet t’i bëjë ballë krizës
Shefja e Fondit Monetar Ndërkombëtar, Christine Lagarde tha se ekonomia botërore ndodhet në një moment delikat, për shkak të ngadalësimit të aktivitetit dhe pasigurive si Brexit dhe lufta tregtare. Lagarde foli për tensionet tregtare mes Kinës dhe Shteteve të Bashkuara si dhe mënyrat se si Eurozona mund të përballojë krizën e radhës.
“Jemi në një moment delikat ku rritja ekonomike është ngadalësuar. 70% e ekonomisë botërore është ngadalësuar, prandaj dhe mund të themi se është përhapur gjerësisht. Ka çështje specifike që përbëjnë burim shqetësimi si Brexit si dhe lufta tregtare që ka shtuar ankthin në të gjithë botën.”
Lagarde tha se ndikimi i bisedimeve tregtare do të varet nga spektri i temave që do të trajtohen dhe përpikmëria e tyre. Sipas saj, do të ishte pozitive nëse trajtohen çështje si mbrojtja e pronës intelektuale, transferimi i detyrueshëm i teknologjisë, roli i sipërmarrjeve shtetërire dhe tarifat. Fondi paralajmëroi gjithashtu se Eurozona duhet të jetë e fortë që t’i bëjë ballë krizës së ardhshme.
“Nëse Eurozona mund të përfundojë një union të fortë bankar dhe të krijojë dhe fuqizojë një treg të letrave me vlerë, do të kishte fuqinë për t’i bërë ballë krizës së ardhshme.”
Lagarde shtoi se aktualisht, unioni bankar dhe tregu në nivel të Eurozonës është ende i papërfunduar. Sipas saj, disa vende mund të përballojnë shpenzimet në infrastrukturë, edukim dhe teknologji, ndërsa të tjera, duhet të ndërtojnë kapacitet fiskal, për shkak të problemeve me borxhin.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.