Ekonomia po largon shqiptarët, Basha: Do të “luftojmë” kundër rritjes së TVSH-së
Shqiptarë po largohen nga vendi si rezultat i gjendjes ekonomike, është shprehur kreu i demokratëve Lulzim Basha. Këtë deklaratë Basha e ka bërë referuar të dhënave të Barometrit të Ballkanit.
Sipas kryedemokratit, Barometri konfirmon se 39 për qind e shqiptarëve nuk paguajnë dot faturën e ujit dhe të dritave ndërsa 30 për qind nuk përballojnë dot blerjen e ushqimeve bazë.
Referuar TVSH-së në biznesin e vogël Basha është shprehur se do të rritet numri i qytetarëve që nuk do të kenë mundësi që të përballojnë jetën.
“Nga janari, jetesa do të jetë edhe më e vështirë, apo të themi më saktë mbijetesa, për shkak të rritjes së pritshme të çmimeve të konsumit, sepse Edi Rama do të fusë biznesin e vogël në skemën e pagesës së TVSH-së. Përfytyroni se sa do rritet numri i të pamundurve, dhe se sa akoma më të pamundur do ta kenë ata që ta mbyllin muajin. Para kësaj gjendje dramatike, çdokush mund të pyesë, çfarë bën qeveria, çfarë bën kryeministri i një vendi kur sheh këto tregues? Kryeministri nuk do t’ia dijë, sepse nuk ka asnjë raport llogaridhënie me qytetarët, sepse ka ardhur në pushtet me votë të blerë e të dhunuar, pa asnjë program, por me mashtrime të paketuara me propagandë.”
Më tej Basha është shprehur se partia që ai drejton do të luftojë kundra rritjes së TVSH. Por të gjitha ndërhyrjet që do të bëhen duhet që të nisin që nga gjeneza pra që nga garantimi i votës së lirë dhe të ndershme.
“Vota e lirë do ta kishte shpëtuar vendin nga gremina, pas keqqeverisjes 4 vjeçare. Vota e lirë është e vetmja që do ta shpëtojë vendin, sepse i kthen pushtetin qytetarit, vendos rendin dhe ligjin. E çon buxhetin e shtetit për hapje të vendeve të punës dhe për kërkesat reale të njerëzve. Dhe është e vetmja mënyrë për të zhbllokuar integrimin europian.”
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.