Ekonomia si subjekt kërkimor e publicistik – Librat dhe autorët e huaj të ardhur në shqip gjatë muajve të fundit – SCAN Magazine

Njerëzit e botës së letrave e veçanërisht specialistët e ekonomisë shpesh ngrenë shqetësimin se në Shqipëri iu kushtohet pak ose aspak rëndësi librave të specializuar, duke krijuar kështu mungesa titujsh në një komunitet të gjerë lexuesish të interesuar rreth tij. Por situata ka ardhur gradualisht në përmirësim dhe në kohët e fundit fluksi i botimeve që e kanë ekonominë si temë kërkimore dhe publicistike është shtuar. Bazuar në këtë fakt, por edhe për rëndësinë që kanë botimet ekonomike si për ekspertët e fushave të caktuara të saj, për studentët dhe gazetarët por edhe për lexuesin e gjerë, SCAN magazinë, hap një rubrikë të re kushtuar ekskluzivisht botimeve  ekonomike. Titujt e mëposhtëm janë përzgjedhur edhe si ardhje të reja në libraritë e kryeqytetit por edhe si rekomandime për shtresa të veçanta lexuesish.

1. LOJA E PAFUNDME

Nga autori bestseller i Nju Jork Times për librat “Fillo me pse” dhe “Liderët hanë të fundit”, na vjen një strukturë e guximshme për lidershipin, në botën e sotme që ndryshon vazhdimisht. Si mund të fitojmë në një lojë që nuk ka fund? Lojërat e fundme, si futbolli apo shahu, kanë lojtarë që dihen, rregulla fikse dhe një pikë fundore të qartë. Fituesit dhe humbësit identifikohen lehtë. Në lojërat e pafundme, ato që nuk kanë vijë finishi, si biznesi, politika, apo dhe vetë jeta, lojtarët vijnë e ikin. Rregullat në një lojë të pafundme janë të ndryshueshme sepse lojërat e pafundme nuk kanë një pikë fundore të përcaktuar. Nuk ka as fitues e as humbës – vetëm përpara dhe pas. Pyetja është, si të luajmë që të kemi sukses në lojën ku ndodhemi? Në këtë libër zbulues, Simon Sinek na ofron strukturën për të udhëhequr me një mendësi të pafundme. Nga njëra anë, askush nga ne s’mund t’i rezistojë emocioneve të shkurtra të një ngritjeje në detyrë apo të fitimit të një gare, e megjithatë këto triumfe zbehen shpejt. Në ndjekje të një kauze të drejtë, ne do t’i zotohemi një vizioni për një botë në të ardhmen që është kaq tërheqëse, saqë do ta ndërtojmë javë pas jave, muaj pas muaji, vit pas viti. Pavarësisht se nuk e dimë formën e saktë që do të marrë kjo botë, përpjekja për ta realizuar këtë i jep kuptim punës dhe jetës sonë. Liderët që përqafojnë një mendësi të pafundme ndërtojnë organizata më solide, më novatore dhe më frymëzuese. Në fund, ata do të jenë individët që do të na udhëheqin drejt së ardhmes.

2. EVROPA EKONOMIKE DHE E ARDHMJA E SAJ

Pas më shumë se një gjysëm shekulli ekzistence, Evropa shfaq rezultate ekonomike pozitive që e rendisin atë në vendin e parë në botë për prodhimet industriale dhe bujqësore, shërbimet, konsumin, tregtinë ndërkombëtare, investimet e huaja të drejtpërdrejta. Ky libër ka si objektiv të bëjë një analizë rigoroze të përmbajtjes dhe natyrës së Evropës ekonomike dhe sociale që po ndërtohet aktualisht, me qëllim vënien në dukje të forcave dhe dobësive që mund të shpjegojnë krizën e besimit që po kalon. Ai ka gjithashtu për qëllim të tregojë sfidat e ndryshme, raportet e forcave dhe skenarët që do të përcaktojnë Evropën e së nesërmes: Midis zonës së shkëmbimit të lirë dhe hapësirës politike të integruar.

Ky libër u dedikohet studentëve të shkencave ekonomike dhe sociale dhe të gjithë lexuesve të ineresuar për këto fusha. Autorët Jean-Yves Letessier, Jacques Silvano dhe Robert Sion, profesorë të shekncave ekonomike dhe sociale e kanë konceptuar veprën e tyre të ndarë në kapitujt e mëposhtëm: 1-Treguesit statistikorë të Evropës, 2-Tregu i madh dhe bashkimi monetar, 3-Integrimi, buxheti dhe politikat ekonomike të Bashkimit Evropian, 4-Politika bujqësore e përbashkët, 5-Politika industriale evropiane midis politikës së konkurencës dhe ekonomisë së njohjes, dhe 6- Evropa sociale, sfida e madhe.

3. TË SHESËSH GJITHÇKA: JEFF BEZOS DHE EPOKA AMAZON

Historia vendimtare e Amazon.com, një prej kompanive më të suksesshme në botë, dhe e themeluesit të saj të jashtëzakonshëm e ambicioz, Jeff Bezos. Amazon.com filloi duke shpërndarë libra përmes postës. Por themeluesi i saj vizionar, Jeff Bezos, nuk donte të mbetej një librashitës. Ai synonte që Amazon të bëhej dyqani ku shitej gjithçka, përmes ofrimit të zgjedhjeve të panumërta dhe lehtësive tërheqëse, me çmime shumë të ulëta. Për ta bërë këtë, ai krijoi një kulturë ambicieje dhe fshehtësie të pamëshirshme që nuk është zbuluar kurrë, deri në momentin e tanishëm. Brad Stone pati mun- dësinë të takonte punonjës e ish-punonjës të Amazon dhe familjarë të Bezos-it, duke u dhënë kështu lexuesve rrëfimin e parë të thelluar nga sytë e një vëzhguesi, të jetesës brenda kompanisë. Krahasuar me novatorët e tjerë elitarë në teknologji si Jobs, Gates dhe Zuckerberg, Bezos është i rezervuar. Megjithatë, ai dallohet për ndjekjen e palodhshme të tregjeve të reja, duke e çuar kompaninë Amazon drejt sipërmarrjeve me risk si Kindle dhe cloud, dhe duke e transformuar shitjen me pakicë ashtu siç Henry Ford revolucionarizoi prodhimin industrial.  “Të shesësh gjithçka” do të jetë biografia zbuluese dhe vendimtare e kompanisë që vendosi njërin nga bastet e parë të mëdhenj për internetin, e që ndryshoi përgjith- monë mënyrën se si blejmë dhe lexojmë. “Jeff Bezos-i është një nga novatorët më vizionarë, më të fokusuar dhe më këmbëngulës të kohëve tona dhe ashtu si Steve Jobs-i, ai transformon dhe shpik industri. Brad Stone ngërthen mes faqeve të këtij libri gjithë pasionin dhe shkëlqimin që dëshmon Jeff Bezos”. Kështu shprehet në përcjelljen e këtij libri autori i biografive shumë të njohura për Steve Jobsin, Ajnshtajnin dhe Leonardo da Vincin, shkrimtari dhe gazetari Valter Isakson.

4. GJAK I KEQ

Shtëpia botuese Botart ka hedhur në qarkullim librin “Gjak i keq” të gazetarit amerikan John Carreyrou, një libër brilant rreth një skeme mashtrimi, i shkruar me mjeshteri. Një libër që sugjerohet për tu lexuar nga të gjithë ato që përpiqen të ndërtojnë teori konspirative duke patur një botëkuptim prej fallxhori, pa analizuar faktet, por përkundrazi duke shpikur fakte. Ky libër, tregon se si analizohen faktet, si lind dyshimi i arsyeshëm, si “piqet” e formohet gradualisht bindja për dicka që nuk shkon, si ngacmohet përshtypja që ajo çfarë paraqitet nuk është gjithmonë e vërtetë etj. Libri është një leksion për të gjithë ata që për të siguruar komoditetin e jetës së tyre e familjes bëjnë gjithcfarë kompromisesh me të keqen, me mashtruesen, me të dëmshmen, duke krijuar kështu kosto të mëdha për komunitetin. Ilustrimi brilant i kesaj kategorie personash është ndërtimi dhe lulëzimi i skemave piramidale të vendit tonë rreth 25 vite më parë. Por ky libër do të ishte i çmueshëm edhe për biliotekën e çdo gazetari. John Carreyrou është një gazetar brilant, fitues dy here i cmimit Pulitzer. Nëpërmjet këtij libri të shkruar me mjeshtëri, ai na tregon se karriera e vërtetë e gazetarit nuk është ajo zyrtarja, burokratikja. Pra, posti apo titulli që ke mbajtur në redaksitë e gazetave ku ke punuar. Por dëshmi e një karriere të mirëfilltë, e një karriere të admiruar është progresi profesional, fitimi i mjeshtërisë për të aplikuar gjini të vështira të gazetarise. Duke kulmuar me ushtrimin siç duhet të gazetarisë investiguese, si gjinia më e dobishme gazetareske për komunitetin në tërësi dhe armike e të korruptuarve dhe kriminelëve të shoqërisë.

Jolanda Shuaipi / SCAN Magazine

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.