Ekonomisë “i del dehja” e TAP-it – Energjia dhe ndërtimi frenojnë rritjen në 2.31%
Ekonomia shqiptare shënoi sërish një rritje të dobët në tremujorin e dytë të vitit. Sipas të dhënave nga instituti i Statitikave, prodhimi i brendshëm bruto u rrit me 2.31%, me një përmirësim shumë të lehtë nga rritja prej 2.21% e tremujorit të parë. Edhe për tremujorin e dytë rritja ekonomike u frenua ndjeshëm nga tkurrja e prodhimit të energjisë elektrike, por edhe nga rënia e sektorit të ndërtimit. Sipas Instat, rënia e prodhimit në ndërtim lidhet sidomos me përfundimin e punimeve në gazsjellësin TAP. Gjithashtu, një ndikim të konsiderueshëm ka dhënë edhe rënia e thellë në sektorët e lidhur me artin dhe argëtimin. Rritja ekonomike në tremujorin e dytë u mbështetet kryesisht te aktiviteti tregtar dhe te degët e tjera të shërbimeve, sidomos telekomunikacionet she shërbimet financiare.
Përfundimi, në pjesën dërrmuese, i projektit të gazsjellësit TAP është reflektuar edhe në rënien e investimeve në ekonominë shqiptare. Sipas Instat, formimi bruto i kapitalit fiks, që kishte qenë shtysa kryesore e rritjes ekonomike në pesë vitet e fundit, për tremujorin e dytë të këtij viti pësoi rënie.
Dobësimi i rritjes ekonomike këtë vit ishte pjesërisht i parashikuar, për shkak të ndryshimit të skajshëm në sasinë e prodhimit të energjisë elektrike. Por, këtë vit po materializohet edhe efekti i pritshëm nga përfundimi i gazsjellësit TAP. Kjo ka bërë që frenimi i ekonomisë të rezultojë edhe më i fortë se parashikimet: në gjysmën e parë të vitit rritja e PBB-së pothuajse është përgjysmuar krahasuar me vitin e kaluar. Për gjysmën e dytë të vitit, shpresat janë për një përmirësim, e ndikuar nga sezoni i mbarë turistik, por edhe nga zbutja e efektit të bazës krahasuese në prodhimin e energjisë elektrike.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.