Ekonomistja e BB në Tiranë për ‘Argument’: “Borxhi publik duhet të bëhet i qëndrueshëm pas krizës”

E ftuara e parë në emisionin “Argument” nga Enio Civici për këtë të enjte ishte Znj. Hilda Shijaku, kryeekonomiste e Bankës Botërore në Tiranë.

Institucioni i Bankës Botërore ka lëshuar ditën e sotshme një raport për vendin tonë, i cili vlerëson se PBB do të rritet në vitin e ardhshëm, nëse pandemia mbahet nën kontroll dhe procesi i rindërtimit vihet në funksion të ushqyerjes së ekonomisë. Këtë vit, ekonomia e vendit tonë pritet të tkurret me 8.4%, sipas parashikimit të BB.

Znj. Shijaku vlerësoi sa i përket paketave ndihmuese për ekonomitë, lëshuar nga qeveritë e vendeve të Ballkanit Perëndimor, se ato kanë dhënë një kontribut pozitiv dhe lehtësues për ekonomitë, sidomos për shtresat në nevojë dhe bizneset, por “pandemia do të vazhdojë ndaj duhen krijuar resurse të reja financiare”.

“Në Shqipëri, në vijim këtyre masave, ka ardhur në ndihmë dhe fondi i rikonstruksionit, i cili ka lehtësuar ekonominë nga goditja e pandemisë.”, është shprehur Znj. Shijaku. Për rënien e parashikuar me 8.4%, Znj. Shijaku ka theksuar se sektorët që do kontribuojë më shumë në këtë tkurrje janë sektorët e turizmit, eksportet neto dhe rënia e konsumit.

Lidhur me papunësinë, një çështje e prekur nga raporti i BB, Znj. Shijaku është shprehur se: “Zgjidhja e problemit të papunësisë në afatgjatë kërkon shfrytëzimin e oportuniteteve që lindin pas krizave të caktuara, për shembull rialokuimin e fondeve nga sektorët në humbje, tek sektorët me shumë prodhimtari. Ulja e informalitetit, investimi në kapitalin human dhe rritja e aftësisë së firmave për të rinovuar produktet dhe prodhimin e tyre gjatë dhe pas krizës, janë gjithashtu disa masa të domosdoshme.” Si shembull, kryeekonomistja e BB në Tiranë ka dhënë digjitalizimin e ekonomisë, që është një domosdoshmëri në rastet kur tregu fizik mungon.

Për borxhin publik, Znj. Shijaku është shprehur se rritja e tij ka qenë normalitet i vendeve të rajonit për shkak të deficitit buxhetor që u krijua nga kriza e pandemisë. “Tregjet financiare janë përgjigjur në nevojat e borxhit, gjë që ka qenë pozitive, por me kalimin e krizës duhet menduar për burime financiare shtesë që të synohet qëndrueshmëria”, ka përfunduar Znj. Shijaku.

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.