Ekskluzive/ Moody`s për Shqipërinë – Ekonomia në rënie me 1.5% këtë vit, do të ndikojë Italia

Ekonomia shqiptare do të bjerë me një normë prej 1.5% këtë vit, thotë agjencia e vlerësimit të kreditit Moody`s, në raportin më të fundit për Shqipërinë, i cili vjen në një kohë kur e gjithë bota është në krizë si rrjedhojë e covid-19. Raporti është siguruar ekskluzivisht nga “Scan”. Vitin e ardhshëm ndërkohë pritet një rritje e ndjeshme e ekonomisë, me një normë mbi 5%.

FMN vetëm dy ditë më parë ndërkohë, fliste për një recesion ekonomik në 5%. “Pavarësisht numrin të ulët të rasteve me covi-19, ne presim që ekonomia shqiptare të preket në mënyrë të ndjeshme, si pasojë e lidhjeve financiare dhe tregtare me Italinë”,-thotë Moody`s.

Edhe ngadalësimi i ekonomisë globale do të impaktojë së tepërmi sektorin e tekstileve dhe këpucëve, që përbëjnë një pjesë të rëndësishme të eksporteve shqiptare.

Ndër të tjera, agjencia e vlerësimit të kreditit, thotë se ekonomia shqiptare u rrit me vetëm 2.2% gjatë vitit të kaluar, me ngadalësimin që ka ardhur si pasojë e efektit të kushteve të motit në prodhimin energjetik, dhe padiskutim si rrjedhojë e tërmetit të 26 nëntorit.

Projeksionet e tjera tregojnë se, inflacioni këtë vit do të ngjitet në 2.5%, Ndërsa borxhi publik në raport me Prodhimin e Brendshëm Bruto do të kapë 72.1%, në rritje me 3.5% krahasuar me vitin paraardhës.

Hapja e negociatave me Bashkimin Europian nga ana tjetër do të mbështesë ekonominë e vendit në terma afat-gjatë.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.