Ekskluzive/FMN vjen në Tiranë me 2 misione! Para zgjedhjeve u paralajmërua marrëveshje e re
Ndërsa qeveria e re po bëhet gati të nisë procesin e ristrukturimit, të zbatimit të programit të ri qeverisës e të përfundimit të draftit të buxhetit të ri që do të depozitohet pas pak javësh në Kuvend, në Tiranë kanë mbërritur përfaqësuesit e misionit të Fondit Monetar Ndërkombëtar. Gazetarja e televizionit SCAN Violeta Shqalsi raporton se janë dy misione të FMN-së që kanë mbërritur në Tiranë, njëri afatshkurtër e tjetri afatgjatë.
Ashtu si në vitet e mëparshme, misioni i FMN-së pritet të jetë pjesë e konsultës për programet e reja të njoftuara nga qeveria, ashtu sikurse edhe për buxhetin e ri e paketën fiskale të vitit të ardhshëm.
Para zgjedhjeve, përfaqësues të lartë të qeverisë shqiptare kanë paralajmëruar se këtë vjeshtë do të ketë një marrëveshje të re bashkëpunimi me Fondin Monetar Ndërkombëtar, pasi ka përfunduar programi 3 vjeçar i mëparshëm i rimëkëmbjes ekonomike. Pas përfundimit të programit, FMN në Shqipëri është në rolin e monitoruesit të ecurisë së zbatimit të rekomandimeve.
Ndërkohë, edhe përfaqësuesi i përhershëm i Fondit Monetar Ndërkombëtar në Shqipëri është shprehur i gatshëm për të bashkëpunuar afër me qeverinë që do të dilte nga zgjedhjet e 25 qershorit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.