Ekskluzive/Ngjitet me 5 pozicione Shqipëria – WEF: E para në rajon. Raporti i konkurrueshmërisë 2018, ekonomia dhe bursa nxisin përmirësimin
Shqipëria ka fituar pesë pozicione në raportin e konkurrueshmërisë globale 2017-2018 të Forumit Ekonomik Botëror. Ky raport është një ndër dy më të rëndësishmit në nivel global, së bashku me lehtësinë e të bërit biznes të Bankës Botërore.
Raporti është mjaft i zgjeruar dhe analizon ecurinë e secilit prej 137 ekonomive të ekzaminuara në bazë të faktorëve të ndryshëm që përcaktojnë edhe nivelin e konkurrueshmërisë së atij vendi.
Këtë vit, Shqipëria renditet në vendin e 75-të në botë, dhe vazhdon të lërë pas Serbinë, Malin e Zi, Greqinë dhe Bosnje Hercegovinën. Maqedonia ndërkohë është përjashtuar nga renditja e këtij viti për shkak të të dhënave të pamjaftueshme, duke e katapultuar për rrjedhojë vendin tonë të parin në rajon.
Me raportin e këtij viti, përmirësimi në harkun e tre viteve të fundit fiksohet në 22 pozicione, duke pasur parasysh se në raportin e vitit 2014-2015, Shqipëria renditej në vendin e 97-të.
Po të shohim më vëmendje nën-indikatorët që përbëjnë indeksin e përgjithshëm, vihet re qartë se, përmirësimi me 5 pozicione i Shqipërisë në këtë raport prestigjioz vjen ekskluzivisht si pasojë e ambientit makroekonomik. Në këtë nën-indikator, vendi ynë renditet i 75-ti në botë, nga vendi i 93-të i një viti më parë.
Në total janë 12 nën-indikatorë që përfaqësojnë 12 shtylla të ndryshme. Përmirësim të ndjeshëm vendi ynë ka bërë edhe në atë që i referohet institucioneve, nga vendi i 76-të i një viti më parë, në atë të 68-të në raportin e këtij viti.
Në atë të infrastrukturës ndërkohë ka humbur plot tre pozicione, dhe sot renditet në vendin e 94-të në botë, gjë që peshon së tepërmi në indeksin e përgjithshëm.
Një përmirësim të ndjeshëm, me plot 13 pozicione në renditje shënon edhe nën-indikatori që i referohet zhvillimit të tregut financiar, nga vendi i 94-të një vit më parë, në të 81-tin sot. Ky përmirësim lidhet ngushtë me zhvillimet më të fundit, e veçanërisht me licencimin e bursës së parë private shqiptare, që do të nisë punën shumë shpejt.
Përmirësim të ndjeshëm kanë pësuar edhe nën-indikatorët që i referohen sofistikimit të biznesit dhe inovacionit. Raporti global i konkurrueshmërisë së Forumit Ekonomik Botëror është një ndër dokumentet më të rëndësishëm për secilin vend, sidomos në sytë e investitorëve të huaj, për të mos përmendur të brendshmit.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.