Eksperimenti i Kirgistanit – Guvernatori kërkon që çdo qytetar të zotërojë 100 gram ar
Banka Qendrore e një vendi në Azinë Qendrore, të rrethuar nga Kina dhe Kazakistani, po ndërmerr një eksperiment të pazakontë: kthimin e kursimeve nga bagëtia në ar.
Banka Qendrore e Kirgistanit, një nga vendet e para post-Sovietike që ka adaptuar një valutë të re dhe e ka lënë të tregtohet pa ndërhyrje, kërkon që qytetarët të diversifikojnë asetet në ar.
Guvernatori i bankës, Tolkunbek Abdygulov, thotë se ka ëndërruar gjithmonë që secili prej 6 milionë qytetarëve të vendit të zotërojë të paktën 100 gram (3.5 onz) të metalit të çmuar, që përkthehet në 4336 dollarë me çmimin e sesionit të sotëm tregtar.
Sipas tij, ari mund të ruhet për një kohë të gjatë dhe pavarësisht luhatjeve në tregjet ndërkombëtarë, në aspektin e kursimeve, nuk e humbet vlerën për popullsinë e vendit.
Në një periudhë 2-vjeçare kur banka ofroi shufrat e arit në mënyrë direkte drejt popullsisë, janë shitur rreth 140 kg, thotë Guvernatori. Ai shton se në zonat periferike, bagëtia është ende aktivi i preferuar për kursimtarët.
Kyrgyzstani ka ecur kundër rrymës duke përshpejtuar blerjet e arit ndërkohë që vendet e tjera kanë ulur blerjet në vitin e kaluar, në nivele rekord të ulëta.
Në botën në zhvillim, ari shihet si gjëja më e sigurt në një kohë të trazirave. Guvernatori i Bankës Qendrore atje mendon se plani është realist, pavarësisht se nënkupton që popullsia do të zotërojë rreth 30 herë më shumë se prodhimi aktual kombëtar.
Ai nuk detajoi ndonjë afat kohor se kur çdo person do të marrë 100 gram ar. Mundësitë e ruajtjes përfshijnë depozita në huadhënësit tregtar apo me Bankën Qendrore.
Me prodhimin vjetor të vendit në 20 ton në vit, Banka përdor valutën kombëtare për të blerë arin e nxjerrë brenda vendit, thotë Guvernatori.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.