Eksperti nga misioni i OBSH: “Mos u mbështesni në inteligjencën amerikane për virusin”

Misioni i Organizatës Botërore të Shëndetësisë në Wuhan përfundoi pa gjetur burimin e koronavirusit, duke nxitur kritikat nga Uashingtoni. Por, ekspertët kanë gjetur linja të reja hetimi, disa prej këtyre të propozuara nga Kina. Një anëtar i ekipit që bëri pjesë në misionin e OBSH-së nuk ka hezituar të bëjë komentet e tij, nisur nga kritikat e shumta.

Zoologu Peter Daszak ishte pjesë e misionit special në Wuhan për të hetuar burimin e COVID – 19. Në vërejtjet e postuara në Twitter, Daszak tha se Presidenti i SHBA-së, Joe Biden “duhet të duket i ashpër për Kinën”.

“Ju lutemi mos u mbështetni shumë në inteligjencën amerikane: gjithnjë e më shumë të shkëputur nga Trump dhe sinqerisht i gabuar në shumë aspekte” shtoi zoologu ndër të tjera.

Komentet e Daszak në Twitter lidheshin me një artikull mbi komentet e Departamentit të Shtetit të SHBA, të cilat  hedhin dyshime mbi transparencën e bashkëpunimit të Kinës me misionin e OBSH- së. Sipas Deutsche Welle, ekspertët e OBSH-së ecën në një “litar diplomatic” ndërsa kryenin hetimin e tyre në Wuhan.

Ish Presidenti i SHBA-së, Donald Trump, shpesh ia hidhte fajin Kinës për virusin. Trump përsëriste një teori të diskutueshme që virusi mund të ketë shpëtuar nga një laborator në Wuhan. Ekipi i OBSH-së arriti në përfundimin se kjo ishte “jashtëzakonisht e pamundur”.

Para se ekipi ndërkombëtar të drejtohej në Kinë, SHBA  paralajmëroi se çështja nuk do të politizohej. Kishte një grindje të mëtejshme diplomatike pasi OBSH tha se dy ekspertëve të tyre fillimisht u ishte mohuar hyrja në Kinë në fillim të janarit, përpara hetimit.

Edhe pse misioni i OBSH-së në Kinë përfundoi pa gjetur burimin e koronavirusit, ekspertët e huaj ranë dakord se virusi me shumë gjasa ka kaluar nga lakuriqët e natës në një qenie të panjohur shtazore, përpara se të mbërrinte te njerëzit.

Burimi origjinal: Deutsche Welle

Përshtati në shqip: SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.