Eksplorimi për naftë në 2 blloqe – Shtyhet afati për investitorët e interesuar të aplikojnë për bllokun B dhe E
Agjencia Kombëtare e Burimeve Natyrore ka shtyrë afatin e aplikimit për investitorët që kanë interes për eksplorimin e naftës në bllokun B dhe E në tokë. Fillimisht, afati i fundit ishte data 22 prill, por përmes një urdhri të Ministrisë së Infrastrukturës dhe Energjisë, tashmë ofertat mund të dorëzohen deri në datën 21 qershor. Fushata e promovimit për blloqet e lira të kërkimit të naftës nisi në muajin mars të këtij vit, teksa përfshin bllokun E me një sipërfaqe prej rreth 700 km2, e që në pjesën jugore kufizohet me bllokun Dumrea, ndërsa në veri me bllokun D të kërkimit.
Ndërkohë që, sipërfaqja e Bllokut B është 776 km2, teksa në pjesën perëndimore kufizohet me detin Adriatik, ndërsa në lindje me bllokun D. Rreth 3 muaj më parë edhe kompania Albpetrol nxorri për shprehje interesi fushate lira të gazit të Povelcës dhe Frakullës për të gjithë investitorët që duan të ushtrojnë aktivitet në këtë sektor. Kjo ishte hera e parë, pas shumë vitesh që Albpetrol nxorri për shprehje interesi fushat e lira që ka në administrim, ndërkohë që më herët edhe Agjencia Kombëtare e Burimeve Natyrore ndërmori një tjetër fushatë promovimi për blloqet e lira të kërkmit të naftës, teksa ofroi për eksplorim bllokun C, bllokun Panaja dhe bllokun Dumrea.
Ndërkohë që, pas kësaj fushate u arrit të nënshkruhej marrëveshja me kompaninë italiane ENI, për nisjen e operacioneve të kërkimit në bllokun Dumrea. Më herët, AKBN ndërmoi procedura të ngjashme edhe për bllokun C, për të cilin pati një shprehje interesi, por nënshkrimi i marrëveshjes hidrokarbure nuk u arrit.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.