Eksportet, 2020 nis me rritje – Deficiti tregtar ra me 7.1% për muajin Janar
Pasi mbyllën një vit zhgënjyes, eksportet shqiptare e kanë nisur në rritje vitin 2020. Mbështetur në të dhënat e Instat, për muajin janar Shqipëria eksportoi 23 miliardë lekë mallra, në rritje me 5.2% krahasuar me të njëjtën periudhë të një viti më parë. Rritja e eksporteve është mbështetur kryesisht nga rritja e grupeve “minerale, lëndë djegëse, energji” dhe “materiale ndërtimi e metale”. Të dy këto grupe i zgjeruan eksportet me rreth 17% krahasuar me një vit më parë. Ecuria krahasimore e eksporteve, sidomos në muajt e parë të vitit, pritet të ndikohet nga shuarja e luhatjeve të mëdha në bazën krahasuese për energjinë elektrike. Në gjysmën e parë të vitit 2018 rritja e lartë e prodhimit të energjisë u reflektua në shifrat e eksporteve, ndërsa në rënia drastike vitin e kaluar solli rënie të madhe të tyre. Deri tani këtë vit, ecuria e prodhimit të energjisë dhe e eksporteve të këtij produkti nuk shfaq diferenca shumë të mëdha krahasuar me vitin e kaluar.
Ndërkohë, grupi “tekstile dhe këpucë” e ka nisur në rënie edhe vitin 2020, me 5% më pak krahasuar me janarin e vitit të kaluar. Megjithëse sektori i fasoneve vazhdon të jetë grupit më i madh i eksporteve shqiptare, qysh vitin e kaluar ai pësoi një rënie me 4.4%. Për sa i takon partnerëve tregtarë, gjatë janarit është regjistruar një rritje e ndjeshme e eksporteve drejt Spanjës, Kosovës dhe Gjermanisë, ndërsa eksportet drejt Italisë, Kinës dhe Turqisë kanë pësuar rënie.
Importet ndërkohë pësuan një rënie të lehtë me 0.7% krahasuar me një vit më parë. Rënia u përcaktua sidomos nga tkurrja e ndjeshme e importeve të grupit “minerale, lëndë djegëse, energji”, ndërsa përmirësim shfaqën importet e grupit “makineri”, pajisje, pjesë këmbimi”.
Rrjedhimisht, bilanci tregtar i vendit për muajin e parë të këtij viti është përmirësuar ndjeshëm. Deficiti ka rënë me 7.1% krahasuar me janarin e vitit të kaluar.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.