Eksportet bujqësore 101.6 mln euro – Ja cilat janë produktet më të kërkuara në tregjet e huaja
Eksportet në bujqësi janë regjistruar me rritje gjatë vitit 2017. Vetëm zëri i produkteve bujqësore ka arritur në një vlerë eksportesh në 101.6 milion euro, nga 89.6 milion euro që ka qenë në vitin 2016.
Por cilat janë produktet më të kërkuara nga tregjet e huaja?
Referuar të dhënave zyrtare të Ministrisë së Bujqësisë, mund të vëmë re se produkti më i eksportuar është domatja, me rreth 72.5 mijë ton dhe me vlerë 31.5 milion euro. Ky produkt ndiqet nga pjepri me rreth 38,7 mijë ton, me një vlerë prej 6 milion euro, nga trangujt, perime të tjera të freskëta si dhe lakër, lulelakër, rrepa.
Produktet bujqësore | Pesha | Vlera |
Domate | 72.5 mijë ton | 31.5 milionë euro |
Pjepra të freskët | 38.7 mijë ton | 6 milionë euro |
Kastraveca | 21.6 mijë ton | 8.8. milionë euro |
Perime të tjera të freskëta | 11.7 mijë ton | 7 milionë euro |
Lakër, lulelakër, rrepa | 10 mijë ton | 2.2 milionë euro |
Duket se prodhimi ka qenë i mbarë gjatë vitit që lamë pas, por edhe mundësia për të eksportuar. Vendi ynë paraqet problematika sa i përket kapaciteteve për ruajtjen e prodhimeve, kështu që eksporti është mundësi e mirë për fermerët, për më shumë të ardhura por dhe për të siguruar prodhimin.
Megjithatë përpos faktit se eksporti i produkteve bujqësore është në rritje, importi në këtë sektor është shumë më i lartë, ku gjatë vitit që shkoi ka arritur në 179.5 milionë euro, me një defiçit tregtar prej 77,9 milionë euro.
Përmes Skemave Kombëtare prej 20 milion euro dhe program të IPARD prej 94 milionë euro, Ministria e Bujqësisë ndër prioritet për mbështetje ka investimet në dhoma frigoriferike dhe përpunim të produkteve.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.