Eksportet rriten me 2 mld lekë – Bujqësia në rënie, “kapërcen” blegtoria dhe peshkimi
Eksportet bujqësore janë rritur me 2 miliardë lekë në gjysmën e parë të vitit, krahasuar me të njëjtën periudhë të një viti më parë. Kështu në total, eksportet për blegtorinë, bujqësinë, peshkimin dhe agroindustrinë kanë arriture në 16.3 miliardë lekë nga 14.3 miliardë lekë. Diferencën në shifra këtë vit e bën bujqësia e cila ka rezultuar me rënie, ndryshe nga tre zërat e tjerë edhe pse ka më shumë potencial për eksport për shkak të prodhimit të lartë.
Kontributin më të madh në rritjen e eksporteve e ka dhënë blegtoria dhe sektori i peshkimit, me rritje ka rezultuar edhe agroindustria, ndërsa bujqësia ka shënuar një rënie të lehtë. Sipas shifrave të Ministrisë së Bujqësisë, konkretisht, bujqësia ka pësuar një ulje të lehtë prej (-1.9%) nga 6.5 mld lekë, në 6.4 mld lekë.
Blegtoria, është realizuar në masën 537 mln lekë në janar-qershor 2018, nga 386 mln lekë që ishte në 6-mujorin e parë të 2017 ose me një rritje prej (+39.1%). Ndërsa ka pasur një rritje të ndjeshme të eksportit të peshkut, nga 1.6 mld lekë në rreth 2.6 mld lekë në janar-qershor 2018.
Agroindustria është një zë që gjithnjë është regjistruar me rritje, dhe konkretisht nga 5.7 mld lekë në 6 mujorin e parë të 2017-ës ne , në rreth 6.8 mld lekë në për periudhën janar-qershor 2018. Megjithatë, pavarësisht rritjes së eksporteve, në sektorin bujqësor, importet vijojnë të mbeten në shifra disa herë më të larta në raport me atë që tregtohet jashtë vendit.
Eksportet bujqësore Janar-Qershor 2018
Bujqësia (-1.9%), nga 6.5 mld lekë, në 6.4 mld lekë
Blegtoria (+39.1%), nga 386.1 mln lekë në 537 mln lekë
Peshkimi (+46.3%), nga 1.6 mld lekë në 2.5 mld lekë
Agroindustria (+30.3%), nga 5.7 mld lekë, në 6.8 mld lekë
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.