Eksportet, tjetër “goditje” në nëntor – Deficiti 2.6 miliard euro. Të gjitha grupet më të rëndësishme janë në rënie
Eksportet pësuan një tjetër rënie në muajin nëntor, duke u orientuar gjithnjë e më shumë drejt një viti negativ. Sipas statistikave të Instat, për nëntorin eksportet ranë me 9% krahasuar me të njëjtën periudhë të vitit të kaluar. Kjo rënie e përkeqësoi më tej bilancin e vitit 2019. Për 11 muaj, Shqipëria ka eksportuar gjithsej mallra në vlerën e 277 miliardë lekëve, 4% më pak krahasuar me vitin e kaluar.
Ulja e eksporteve këtë vit ka ardhur për shkak të rënies së njëkohshme të tre grupeve me peshën kryesore “tekstile dhe këpucë”, “minerale, lëndë djegëse, energji” dhe “materiale ndërtimi e metale”. Për nëntorin grupi i mineraleve shënoi një përmirësim të lehtë, ndërsa eksportet e çimentos dhe të metaleve sërish pësuan rënie.
Ngushëllimi për bilancin tregtar është se gjatë nëntorit edhe importet pësuan një rënie të ndjeshme, me pothuajse 6% krahasuar me një vit më parë. Megjithatë, deri tani gjatë këtij viti importet vazhdojnë të jenë në rritje, me 2% ndaj 11-mujorit të vitit të kaluar. Rritja e importeve këtë vit është ndikuar sidomos nga nevojat më të larta për të siguruar energji jashtë vendit, për shkak të rënies drastike të prodhimit vendas.
Rënia e importeve për nëntorin e ka frenuar disi rritjen e deficitit tregtar të vendit, që, sidoqoftë, vazhdon të ketë përmasa mjaft të mëdha. Për 11 muajt e këtij viti, deficiti tregtar në mallra arriti në 317 miliardë lekë ose rreth 2.6 miliardë euro. Krahasuar me vitin e kaluar, deficiti tregtar i vendit është rritur me mbi 8%.
Një zgjerim i deficitit tregtar nënkupton një ndikim më të lartë negativ në prodhimin e brendshëm bruto të vendit. Keqësimi i bilancit të eksporteve neto është një nga faktorët që priten të përcaktojnë një rritje më të dobët ekonomike për këtë vit, krahasuar me vitin 2018.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.