“Elbasan-Librazhd” nën shënjestrën e Policisë – Merren masa për 38 drejtues mjetesh
Policia shtetit ka njoftuar se aksi rrugor nacional “Elbasan-Librazhd” është patrulluar nga Njësia Operacionale e Drejtorisë së Policisë Rrugore në bashkëpunim me Policinë Rrugore të Elbasanit për të evidentuar dhe ndëshkuar shkelësit e kodit rrugor, me qëllim parandalimin e aksidenteve rrugore.
Sipas njoftimit Policia Rrugore ka aplikuar mënyrat e reja të kontrollit, auto vetura të policisë rrugore “civile” të pa uniformuar për të evidentuar shkeljet e normave të sjelljes dhe konkretisht parakalimet e gabuara të cilat janë burim aksidenti.
Policia njofton se parakalimet janë kryer duke shkelur tabelat përkatëse dhe sistemin e sinjalizimit vertikal duke shkelur në mënyrë flagrante dhe të pakujdesshme vijën e pandërprerë.
Gjatë patrullimit janë evidentuar 38 drejtues mjetesh të cilët kanë kryer parakalim të gabuar ku në shumicën e rasteve parakalimet kanë qenë me rrezik të madh për të shkaktuar aksident rrugor. Policia Rrugore lajmëron se ka hartuar masat administrative të cilat do t’iu dërgohen drejtuesve të automjeteve që kanë kryer shkeljen në adresat e banimit të tyre.
Gjithashtu, Policia Rrugore kërkon nga drejtuesit e mjeteve të mos parakalojnë në mënyrë të gabuar gjatë lëvizjes, përqendrim në drejtimin e mjeteve gjatë ditëve të festave, mos drejtim të mjetit nën efektin e alkoolit apo në gjendje të dehur, të përdorin rripin e sigurimit, të respektojnë normat e shpejtësisë së lejuar, të mos përdorin celularin gjatë drejtimit të mjetit, respektim të këmbësorit dhe vendosje të kaskës mbrojtëse.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.