Eliminim i “roaming” për Ballkanin, Harito: Po punojmë draft ligjin, së shpejti paraqitet në kuvend 

Koordinatorja kombëtare për krijimin e zonës ekonomike rajonale ballkanike, Milena Harito, ka folur për emisioni “Argument” me Enio Civici. Harito ka shpjeguar se një nismë konkrete në këtë drejtim është eliminimi i tarifave roaming ndërmjet 6 vendeve të Ballkanit perëndimor.

“Bashkimi europian nuk ka më tarifa suplementare, pra roaming është njëlloj si komunikimet brenda çdo shteti. Ne duam të bëjmë të njëjtën gjë për gjashtë vendet e Ballkanit. Sipas konstatimit tonë pjesa më e madhe e trafikut të operatorëve është midis vendeve të Bashkimit Europian dhe vendeve të rajonit. Pra impakti nëse ne heqim tarifat e roaming për vendet e rajonit nuk është shumë i lartë për operatorët, gjë që është normale, qëllimi nuk është të dëmtohen operatorët, përkundrazi ata e zhvillojnë tregun. Por qëllimi është që cdo njeri nga Shqipëria që shkon në Kosovë, apo çdo kosovar që vjen në Shqipëri, çdo serb që shkon në Mal të Zi të mos paguajë tarifë suplementare nga ajo që paguan kur është në vend të tij. Secili vend duhet të bëjë ndryshimet e veta dhe pastaj të gjashta vendet të bëjnë marrëveshje bilaterale për të ulur tarifat e roaming.”

Për sa i përket afateve, Harito ka shpjeguar se objektivi është miratimi i ligjit në Shqipëri brenda gjashtëmujorit të parë të vitit 2018.

“Objektivi im personal është që kjo gjë të jetë e mbaruar në takimin e ardhshëm të kryeministrave që do të mbahet në Angli”.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.