Emergjenca për ujin e pijshëm – Vëzhgimi i SCAN, vijojnë abuzimet

Një ditë pas ngritjes së task forcës nga Bashkia e Tiranës për evidentimin dhe ndalimin e abuzimeve me ujin e pijshëm, duket se situata vijon të jetë e njëjtë.

Televizoni SCAN përmes një vëzhgimi, ka evidentuar se abuzimet vijojnë duke  ndikuar në lënien pa ujë të shumë familjeve në kryeqytet, pavarësisht thirrjeve për  mos shpërdorimin e ujit të pijshëm.

Një ditë më parë, kreu i Bashkisë shpalli gjendjen e emergjencës duke bërë me dije se   kanë nisur kontrollet për të identifikuar dhe për të ndaluar ndërhyrjet e paligjshme në rrjet, si dhe për të ndaluar subjekte apo qytetarë të papërgjegjshëm që përdorin ujin e pijshëm për vaditje apo për aktivitete të tjera private si lavazhe.

Nga statistikat e fundit të drejtorisë së Ujësjellësit, rezulton se aksioni i djeshëm i bashkisë në terren me Policinë e Shtetit për prerjen e lidhjeve të paligjshme, ka dhënë rezultatet e para duke shënuar  një rritje të nivelit të ujit në rezervuare falë 150 prerjeve të furnizimeve të paligjshme me ujë të pijshëm.

Nertila Doko/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.