Emergjencat Civile: Dëmet e shkaktuara nga tërmeti i djeshëm, grup pune për verifikim në banesa

Pas tërmetit me magnitudë 5.1 të shkallës Rihter, që përfshiu veriun dhe pjesën qendrore të Shqipërisë, Shtabi i Emergjencave Civile ka raportuar mbi dëmet e shkaktuara.

Sipas Emergjencave Civile së fundmi është ngritur grupi i punës për të verifikuar ditën e sotme të gjitha banesat, të cilat kanë shfaqur probleme për shkak të lëkundjeve të tërmetit në bashkinë Mirditë.

“Në datë 08.04.2017, ora 15:52:57, Instituti i Gjeoshkencës, Energjisë, Ujit dhe Mjedisit ka regjistruar një lëkundje tërmeti me magnitudë ML=5.1 Rihter, me thellësi 15 km dhe me epiqendër në fshatin Kthellë, Njësia Administrative Kurbnesh, bashkia Mirditë. Lëkundjet e tërmetit kanë qenë të forta dhe janë ndier në qytet Shkodër, Lezhë, Burrel, Dibër, Klos, Tiranë, Krujë dhe Elbasan. Tërmeti ka shkaktuar çarje të mureve të banesave në këto zona:

– Në fshatin Përlat i Epërm, Njësia Administrative Kurbnesh, është dëmtuar banesa e një shtetasi.

– Në bashkinë Klos kanë pësuar çarje të mureve në 5 banesa.

– Në fshatin Bardhaj, Njësia Administrative Kurbnesh është dëmtuar 1 banesë.

– Në fshatin Bulshare, Njësia Administrative Orosh është dëmtuar 1 banesë.

– Në Njësinë Administrative Orosh, bashkia Mirditë është dëmtuar 1 banesë.

Emergjencat Civile kane qenë në kontakt të vazhdueshëm me përfaqësues të pushtetit vendor për të marrë çdo informacion rreth dëmeve të shkaktuara dhe marrjen e masave për përballimin e situatës”, thuhet në njoftimin zyrtar të Emergjencave Civile.

Ditën e djeshme Drejtori i Përgjithshëm i Emergjencave Civile, Shemsi Prençi, së bashku me Drejtorin e Koordinimit të Prefekturave në Ministrinë e Punëve të Brendshme Bekim Murati kanë shkuar në zonat ku ka rënë tërmeti dhe kanë parë nga afër situatën.

Osman Dedja/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.