Emergjencat, Lista e Rezervave të Shtetit – Në dispozicion 700 çadra, 100 rulotë e kontejnerë, 400 ton miell, 80 ton oriz, 80 ton sheqer

Ligji i ri për Rezervat e Shtetit, që mori prioritet veçanërisht pas tërmetit të nëntorit të vitit të shkuar, ka krijuar edhe listën e detajuar të mallrave që do të jenë në çdo çast të disponueshme për përballimin e situatave të emergjencës. Këshilli Ministrave ka publikuar në Fletoren Zyrtare listën e mallrave që do të mbahen në gatishmëri për këtë qëllim, si dhe kufijtë minimal.

Në dispozicion të situatave emergjente, në dispozicion do të jenë 700 çadra strehimi, bashkë me 100 Mjedise të përkohshme (si rulota, apo  kontejnerë). Për kompletimin e tyre janë vendosur 5 mijë krevate portative të shoqëruara nga 8 mijë dyshekë, 8 mijë complete çarçafësh, e 8 mijë batanijesh. Më tej në listë gjenden 8 mijë palë çizme gome, 5 mijë sete kuzhine dhe 1 mijë pajisje elektroshtëpiake.

Lista përmban edhe një numër të konsiderueshëm rezervash ushqimore, siç janë sasia prej 400 ton miell, 80 ton oriz, 80 ton sheqer, 70 ton makarona, 50 ton vaj ushqimor, 50 ton fasule e 20 ton konserva mishi. 30 mijë sapunë dhe 30 ton detergent janë caktuar për mbulimin e nevojave higjienike gjatë emergjencave.

Ndërkohë që në listë janë përfshirë edhe 120 tonë Ushqim i koncentruar (koncentrat) për kafshët bashkë me 180 ton bar të thatë.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.