Emigracioni “gërryen” Shqipërinë – Popullsia u pakësua edhe në vitin 2018 me 0.3%
Popullsia e Shqipërisë u pakësua edhe gjatë vitit të kaluar. Të dhënat e Instat treguan se popullsia ra me 0.3% dhe në 1 janar të këtij viti Shqipëria kishte 2.86 milionë banorë. Rënia e numrit popullsisë me rreth 8 mijë banorë është produkt i vazhdimit të emigracionit, të kombinuar me pakësimin e shtesës natyrore të popullsisë. Sipas Instat, vitin e kaluar migracioni neto, i shprehur si diferencë mes atij hyrës dhe dalës, ishte negativ me 15.300 individë. Sipas shifrave zyrtare, emigracioni ka rënë lehtë krahasuar me një vit më parë, por ky fenomen vazhdon të gërryejë popullsinë shqiptare. Vitin e kaluar, afro 39 mijë individë e lanë vendin, ndërsa më pak se 24 mijë erdhën në Shqipëri.
Nga ana tjetër, shtesa natyrore është gjithnjë e më e ulët. Vitin e kaluar, kjo shtesë ishte vetëm 7,100 individë, në rënie me 17% krahasuar me vitin 2017. Numri i lindjeve vitin e kaluar ra me 6.3%, ndërsa duke filluar nga ky vit qeveria ka nisur aplikimin e një bonusi më të lartë për të nxitur lindshmërinë.
Rënia e lindshmërisë po sjell rritje të moshës mesatare të popullsisë, që vitin e kaluar arriti në 35.4 vjeç. Një tregues i rëndësishëm social dhe ekonomik, ai i varësisë së të moshuarve, kaloi pragun e 20% gjatë vitit të kaluar. Ky tregues shpreh raportin mes popullsisë mbi 65 vjeç dhe asaj në moshë pune. Rritja e raportit tregon se ka gjithnjë e më shumë pensionistë kundrejt popullsisë që mund të punojë dhe të paguajë kontribute të sigurimeve shoqërore. Kjo e rrit barrën mbi skemën e sigurimeve dhe mbi buxhetin e shtetit.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.