“Ëndrra” e punësimit në Islandë – Makth për emigrantët e painformuar
Bumi i turizmit në Islandë ka sjellë nevojën për punëmarrës sezonalë, vende pune të cilat plotësohen kryesisht nga polakët, shqiptarët, bullgarët dhe rumunët. Janë rreth 2 mijë vende të reja pune në vit që do të mbushen nga emigrantët, si pasojë e rritjes së industrisë së turizmit me 22% dhe plakjes së popullsisë.
Por këta punonjës të rinj nuk i dinë të drejtat e tyre në tregun e punës islandez dhe rreziku është që ata të mos paguhen sipas një kontrate kolektive dhe të mos u paguhen kontributet.
Tregu i zi i punës, përllogaritet të jetë rreth 10 për qind e punonjësve emigrantë, ndërsa në industrinë e turizmit shifrat arrijnë deri në 32 për qind.
Media ishullore shpesh kanë denoncuar këtë abuzim që u bëhet emigrantëve dhe titujt e lajmeve kanë qenë si më poshtë:
- Emigrantët nga Europa Lindore punojnë për 500 euro në muaj si shofer autobusi
- Hotelet dyshohet se punësojnë azilkërkues
- Dyshime për trafik njerëzor, zbulohen dy emigrantë që punonin në bodrum
Autoritetet në Islandë kanë nisur një fushatë për sensibilizimin e emigrantëve në lidhje me të drejtat e tyre, duke vizituar vendet e punës me radhë.
Sipas të dhënave, shumica e tyre nuk kanë askënd tjetër në Islandë dhe nuk ka kush t’i mbrojë nga padrejtësitë, si paga më e ulët.
Ndërkohë numri i shqiptarëve që kërkojnë punë në Islandë përmes të njohurve ose përmes internetit është në rritje. Portale si “expat.com” po shfrytëzohen për të krijuar kontakte për punësim dhe shumë shqiptarë deklarohen në kërkim të një vendi pune çfarëdo.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.