Energjia e pastër në SHBA – Departamenti i Energjisë do financojë $100 mln për teknologjitë e reja

Administrata e Biden lajmëroi se Departamenti i Energjisë do të ofrojë mbi 100 milionë dollarë në financim për energjinë pa karbon dhe të krijojë një grup pune për të ndihmuar në  zhvillimin e kësaj teknologjie.

Këshilltarja kombëtare mbi Klimën, Gina Mcarthy, bëri të ditur lajmin, gjatë mbledhjes së parë tek Shtëpia e Bardhë të Task Forcës Kombëtare të Klimës, që përfshiu liderët e kabinetit nga 21 agjenci federale.

Task forca u krijua nën urdhrin ekzekutiv të Presidentit Joe Biden më 27 Janar për trajtimin e ndryshimit klimatik. Mcarthy tha se administrata e Biden beson tek një zhvendosje agresive tek një ekonomi me energji të pastër, që do gjallërojë ekonominë amerikane dhe do krijojë vende pune.

“Ne do pozicionojmë Amerikën që të krijojë vende pune në një mënyrë të drejtë dhe të barabartë tek komunitetet, që do jenë në vijë të parë të teknologjisë së re të pastër” – tha Mçarthy.

Shtëpia e Bardhë deklaroi  gjithashtu se grupi i ri i inovacionit mbi Klimën, do të përqendrohet në komercializimin e teknologjive si kapja e karbonit dhe bateritë.

Klevis Llaha – SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.