Energjia për prodhuesit e bukës – Peshkëpia: Reduktoni tarifën. OSHEE: Diferenca të rimbursohet nga shteti

Prodhuesit e bukës kërkojnë reduktim të tarifimit të energjisë elektrike për bazën frigoriferike, duke përfshirë jo vetëm furrat, por edhe pastiçeritë apo byrektoret. Kërkesa u bë nga kreu i Shoqatës, Gëzim Peshkëpia, gjatë një seance dëgjimore të zhvilluar pranë Entit Rregullator të Energjisë, ku të pranishëm ishin edhe përfaqësues të Operatorit të Shpërndarjes së Energjisë Elektrike.

“Furrat e bukës që kanë 2-3 bazë frigoriferike mund të kenë një tarifë tjetër të energjisë, por që nga sa kemi dijeni është e papranueshme një tarifë tjetër në furrat e bukës baza frigoriferike është tepër e nevojshme se ne nuk mund të dalim dot të kthejmë furrat e bukës si në ’90 dhe në ’95. Vendimi i Këshillit të Ministrave na bën një çmim të diferencuar me subjektet e tjera, neve dhe prodhuesit e miellit. Mendojmë që kjo tolerancë ose ky subvencionim që i bëhet furrave të bukës është mbi bazën e një konvertimi. Në qoftë se TVSH në të gjithë Europën është nga 0 deri në 8%  , neve e kemi 20% TVSH e bukës dhe kjo është përligjur që i jepet subvencionit në miell dhe në bukë. Ju bëj me dije se fabrikat e miellit nuk prodhojnë vetëm miell për bukë, por prodhojnë edhe për pastiçerinë, për biskoterinë, për të gjitha. Edhe atyre do t’u vihet e njëjta kondicion që do t’u hiqet gjithë subvencioni.”

Drejtori i divizionit të Shitjes dhe Tregtimit në OSHEE, Elton Sevrani tha se është e domosdoshme që diferenca që mund të lindë nga reduktimi i kësaj tarife të rimbursohet nga institucionet shtetërore.

“Meqenëse institucionet ligjvënëse kanë vendosur që disa klientë të jenë më tët= avantazhuar dhe të kenë një tarifë më të ulët ose më saktë të kontribuojnë më pak në kostot që i shkaktojnë OSHEE-së, ne jemi të detyruar t’i bindemi. Në vendimin e Këshillit të Ministrave dhe në tabelën udhëzuese të Entit Rregullator, ka një fjali të thjeshtë: Prodhues mielli, çmimi 76 lekë. Në qoftë se kjo fjali bëhet prodhues mielli, buke, djathi, qumështi, bulmeti, et dje thotë 76 lekë, ne jemi të detyruar ta zbatojmë. Në qoftë se institucione të tjera duan të bëjnë një suport financiar për furrat e bukës prodhuese, ne mbajmë një çmim do ishte gjykimi jonë të përcaktuar në përputhje me kostot e të ardhurat dhe çdo diferencë të përpjesëtohej nga institucioni përkatës, Ministria e Ekonomisë, tatimtaksat, etj.”

Ndërkaq, përfaqësues të Entit Rregullator të Energjisë i kanë kërkuar Operatorit të Shpërndarjes së Energjisë Elektrike të përllogarisë efektet pozitive dhe negative që ka kompania, në rast se diferenca në tarifë nuk rimbursohet.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.