Enkriptimi i mesazheve të Facebook – SHBA dhe aleatët kërkojnë akses për të luftuar terrorizmin

Shtetet e Bashkuara, Mbretëria e Bashkuar dhe Australia, i kanë bërë thirrje Facebook që të mos aplikojë enkriptimin e shërbimit të mesazheve nëse autoritetet ligjore nuk kanë akses, duke thënë se kjo pengon luftën kundër terrorizmit dhe abuzimit të fëmijëve.

Vendet nënshkruan gjithashtu një marrëveshje që do përshpejtojë kërkesat e autoriteteve ndaj kompanive të teknologjisë për informacion mbi komunikimin e terroristëve. Autoritetet mund ta marrin informacionin brenda ditëve, ndërkohë që tashmë duhet të presin 6 muaj deri në 2 vite.

Përplasjet e qeverive dhe kompanive të teknologjisë  mbi të dhënat e përdoruesve, mund të përfshijnë gjithashtu Apple, Google dhe Microsoft. Washingtoni ka bërë thirrje për rritjen e rregullimit dhe ka nisur hetime kundër shumë firmave, duke i kritikuar mbi hendeqet në privatësi, aktivitetet e lidhura me zgjedhjet dhe monopolin në reklamimin online.

Në një letër drejtuar Mark Zuckerberg, 3 vendet aleate bënë të ditur se e mbështesin enkriptimin, por shtuan se është e nevojshme që të balancohet nevoja për të dhëna të sigurta me sigurinë publike.

Këto i bënë thirrje Facebook dhe kompanive të tjera që të lejojnë autoritetet zbatuese të ligjit që të kenë akses ligjor te përmbajtjet në një format të lexueshëm.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.