Erdogan, i trishtuar për inflacionin në 2021 – Në mbi 36%. Presidenti turk lajmëron mbështetje përmes rritjes së pagave
Presidenti turk Recep Tayyip Erdogan tha në nisje të Javës se është i trishtuar prej rritjes së inflacionit vjetor në vend në 36.1% për vitin 2021, duke shtuar se qeveria e tij është e vendosur që ta ulë në një normë 1-shifrore. Duke folur pas një takimi të kabinetit, Erdogan tha gjithashtu se rritja e inflacionit vjen prej rritjes së çmimit të lëndëve të para në botë dhe rënies së lirës turke, që ka humbur mbi 44% të vlerës në vitin e kaluar.
Presidenti turk tha gjithashtu se autoritetet do të inspektojnë rritjen e tepërt të çmimeve dhe lajmëroi mbështetje shtesë për pagat e nëpunësve civilë dhe pensionistëve.
Vetëm për muajin Dhjetor, çmimet e konsumit u rritën me 13.58%, sipas institutit turk të Statistikave, duke gërryer më tej të ardhurat dhe kursimet e turqëve, që janë shqetësuar nga trazirat ekonomike. Lira turke humbi 44% të vlerës në vitin e kaluar, ndërkohë që banka qendrore shkurtoi interesat nën iniciativën e Erdogan për t’i dhënë prioritet kreditit dhe eksporteve, mbi valutën dhe qëndrueshmërinë e çmimeve.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.