Erdogan lufton përsëri interesat e larta – Lira prek rekord të ri të ulët. Opozita bën thirrje për zgjedhje
Presidenti turk, Recep Tayyip Erdogan, i ka dhënë vrull trazirave në treg këtë Javë, kur premtoi se do vazhdojë luftën kundër interesave të larta deri në fund, ç’ka bëri që lira të bjerë në nivele të reja të ulëta dhe nxiti opozitën të bëjë thirrje për zgjedhje të parakohëshme. Erdogan tha se do të heqë barrën e interesave të larta tek njerëzit dhe i bëri thirrje bizneseve që të përfitojnë nga poliktikat lehtësuese monetare për të investuar, punësuar dhe eksportuar mallra.
Ndërhyrja e presidentit tek politikat monetare ka tronditur valutën prej vitesh dhe besueshmërinë e bankës qendrore, që ka ulur normën bazë të interesit me 300 pikë bazë që prej Shtatorit, në 16%. Komentet vijnë ditë pasi banka pritet të shkurtojë përsëri interesat, pavarësisht rritjes së inflacionit në pranë 20%. Lira ra me rreth 3% në sesionin tregtar dhe është tashmë valuta me performancën më të keqe tek tregjet në zhvillim, kryesisht prej ndërhyrjeve të parakohëshme nga banka qendrore, të kërkuara nga Erdogan. “Po e heqim këtë kamzhik të normave të interesit nga shpinat e njerëzve.
Ne nuk mund të lejojmë popullin që të shtypet nga normat e interesit”- tha Erdogan në parlament. Presidenti e ka përshkruar veten si armik të interesave, ka folur në mënyrë të rregullt përpara vendimeve politike dhe ka ndikuar tek lidershipi i bankës qendrore, duke shkarkuar 3 politikëbërës muajin e kaluar. Në kundërpërgjigje të komenteve të Erdogan, lira turke preku nivelin më të ulët historik prej 10.68 kundër dollarit amerikan, dhe sipër 12 kundër Euros.
Valuta ndodhet në rënie me 30% kundër dollarit deri më tani për vitin dhe me 64% në 4 vite. “Banka Qendrore ka braktisur funksionin e stabilitetit të çmimeve dhe e sheh zhvlerësimin e lirës si spektatore”- tha Kemal Kilicdaroglu, lideri i partisë Republikane. “Nuk e qeveris do vendin, na le njëherë të shkojmë në zgjedhje, dhe të formohet një qeveri e re” – tha ai për Erogan.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.