Erdogan sulmon agjencitë e vlerësimit -“Ndëshkojnë Turqinë dhe mbështesin Greqinë e falimentuar”

Presidenti turk Rexhep Taip Erdogan,  ka sulmuar agjencitë e vlerësimit të kreditit, që sapo kanë zhvlerësuar vendin. Ndërkohë që inflacioni në vend ka arritur nivele dyshifrore dhe valuta vazhdon rënien e pjerrët, Banka Qendrore nuk ka ndërhyrë te normat e interesit. Erdogan ka kundërshtuar prej kohësh kërkesat e bankierëve qendrorë. Në përpjekje për të kundërshtuar vendimet e  agjencive të huaja, që kanë ulur vlerësimin e borxhit sovran të Turqisë,  presidenti ka marrë Greqinë si shembull negativ, duke thënë se edhe një vend në falimentim ka vlerësime pozitive.

“Mos i jepni rëndësi vlerësimeve të këtyre agjencive, ato kanë rritur notën për Greqinë që shkoi drejt falimentimit. Po flasim për një vend që nuk mund të paguajë borxhin publik”, tha Erdogan, duke u përpjekur që të ulë besimin e agjencive të vlerësimit. Megjithatë,  faktet janë kundër presidentit turk. Lira preku në datën 25 Prill nivelin më të ulët në histori, në 4.15 kundër dollarit amerikan, që përbën një rënie me 12%  me bazë vjetore.

Për agjencinë e vlerësimeve Moody’s, zhvlerësimi i lirës përbën diçka negative, për shkak se vazhdimi i dobësisë bashkuar me inflacionin në 10.2%, pritet të rrisë nivelin e kredive me probleme në vend. Çështja është se 33% e kredive bankare të Turqisë në fund të 2017-ës ishin të denominuara në valutë të huaj, kryesisht në dollar amerikan dhe euro. Rënia e vazhdueshme e lirës mund të ulë kapacitetin e ripagimit të borxhit në valutë të huaj të kompanive turke. Inflacioni arrit 10.2% në Mars 2018, sipër objektivit të bankës qendrore prej 5%.

Analistët e Moody’s, që kanë ulur vlerësimin e kreditit të vendit së bashku me 2 agjencitë e tjera ndërkombëtare, parashikojnë se zhvlerësimi i lirës do të përshpejtojë inflacionin, duke gërryer fuqinë blerëse të konsumatorëve dhe përfitueshmërinë e bizneseve.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.