ERE “rrëzon” OSSH-në për cilësinë e furnizimit – Ndërprerjet e energjisë s’mund të zgjasin më shumë se 2.78 orë, punimet të njoftohen para 72 orësh
Enti Rregullator i Energjisë ka rrëzuar kërkesën e Operatorit të Sistemit të Shpërndarjes për rishikimin e Treguesve të Matjes për Cilësinë e Furnizimit dhe Performancës së Sigurisë së Rrjetit të Shpërndarjes, ku përcaktohen detyrimet që OSSH ka në drejtim të shërbimit ndaj klientëve. Treguesit u miratuan në muajin prill të këtij viti, por ato u kontestuan nga OSSH, duke kërkuar ndër të tjera që përpunimi, prezantimi dhe proceset e testimit të treguesve të cilësisë, për një periudhë 3 vjeçare të jenë pa efekte financiare të këtyre metodologjive.
Përcaktimi i këtyre treguesve është një detyrim ligjor, që prej vitit 2015, ndërkohë që rregullorja për përcaktimin e tyre është miratuar në vitin 2017. Për këtë arsye, në vendimin e saj ERE argumenton se periudha nga viti 2015 deri në hyrjen në fuqi të treguesve është një kohë e mjaftueshme për të ndërmarrë gjithë hapat e nevojshme nga ana e OSSH, me qëllim përmbushjen e detyrimeve ligjore.
Ndërkaq, referuar kritereve të miratuara tashmë ndërpreja e energjisë elektrike nuk mund të zgjatë më shumë se 2.78 orë pas një defekti në sistemin e shpërndarjes në tensionin e mesëm dhe të ulët, ndërkohë që kjo kohë është më e shkurtër për rrjetin 35, 20, 6-10 dhe 0.4 KV, duke variuar nga 1 deri në 2.74 orë. Gjithashtu, periudha e njoftimit të ndërprerjeve të planifikuara në sistemin e shpërndarjes duhet të jetë 72 orë, ndërkohë që koha e nevojshme për t’iu përgjigjur ankesave, që kanë lidhje me matjen duhet të jetë 5 ditë pune nga data e paraqitjes së ankesës. Gjithashtu, përcaktohet se koha e nevojshme për të rilidhur energjinë është brenda 48 orësh, nga kryerja e pagesës së detyrimit dhe me kërkesë të klientit.
TABELË
Koha për rikthimin e shërbimit të furnizimit me energji elektrike pas një defekti në sistemin e shpërndarjes
Tensioni i mesëm + Tensioni i ulët
2.78 orë
Rrjeti 35 kV
Zonë urbane 1.73 orë
Zonë rurale 1.77 orë
Rrjeti 20 kV
Zonë urbane 1.34 orë
Zonë rurale 1.70 orë
Rrjeti 6 –10 kV
Zonë urbane 2.54 orë
Zonë rurale 2.74 orë
Rrjeti 0.4 kV
Zonë urbane 1.07 orë
Zonë rurale 1.5 orë
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.