ERE “shkund” OST-në për investimet – “Nuk ka analizë kosto-efektivitet. Të mos mbulohen nga tarifat që paguajnë klientët”

Enti Rregullator i Energjisë ka rrëzuar kërkesën e Operatorit të Sistemit të Transmetimit për miratimin e planit të investimeve me fondet e shoqërisë për vitin 2020, si dhe kërkon rishikimin e planit 10-vjeçar 2015-2020 brenda këtij viti. Sipas Entit Rregullator investimet nuk plotësojnë kërkesat ligjore për paraqitjen e tyre, teksa paralelisht nuk duhet të mbulohen nëpërmjet tarifave të përdoruesve të rrjetit të transmetimit të energjisë elektrike, por nga të ardhurat e realizuara nga dhënia në përdorim të një pjese të infrastrukturës së fibrës optike, duke mos ndikuar në tarifën e transmetimit të energjisë elektrike si dhe në kostot e lidhura me këtë shërbim ndaj klientëve fundorë.

Gjitahshtu, sipas ERE, OST nuk ka paraqitur analizën kosto-përfitim dhe relacionet shpjeguese për investimet e parashikuara. “Analiza kosto përfitim është elementi kryesor për të vlerësuar leverdinë ekonomike të investimit të propozuar dhe mungesa e një analize të tillë, pengon ERE të vlerësojë leverdinë ekonomike të investimeve të propozuara”,-thuhet ndër të tjera në vendim.

Nga ana tjetër, sipas ERE-s investimet e planifikuara nga OST sh.a. për vitin 2020, duhet të kryhen sipas renditjes mbi prioritetin e tyre i cili ka si faktor përcaktues kriteret në zbatim të legjislacionit në fuqi me kosto më të ulët, me qëllim sigurinë e rrjetit, eficenca në transmetimin e energjisë dhe ulja e humbjeve në rrjet me qëllim ruajtjen e stabilitetit tekniko-ekonomik të shoqërisë, por duke siguruar që tarifat e përdorimit të rrjetit të transmetimit të mbeten të qëndrueshme në kohë. Vlera totale e investimeve parashikuar për vitin 2020 është 1.4 mld lekë me kredi, investime për t’u financuar nga OST si kosto lokale në vlerën 90.9 mln lekë dhe grante 72,3 mln lekë.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.