ERE vendos për çmimin e energjisë – Tarifa e shpërndarjes nuk rritet, prekeshin bizneset e dalë në treg të lirë
Tarifa e shpërndarjes së energjisë për bizneset e lidhur në tensionin 35 dhe 20 KV nuk do të rritet. Enti Rregullator i Energjisë ka vendosur të mos shqyrtojë më tej aplikimin e Operatorit të Siststemit të Shpërndarjes, që kërkonte rritjen në 3.32 lekë/kwh për klientët e lidhur në 35 KV apo 120% më shumë nga sa është aktualisht, si dhe rritjen në 4.32 lekë/kwh për klientët e lidhur në 20 kv apo 10% më shumë nga sa është aktualisht.
Në vendimin e saj, ERE argumenton se në kushtet e pandemisë COVID-19, procesi i konsultimit me palët e interesuar nuk ka qenë i mundur, ndërkohë që OSSH nuk ka mundur të paraqesë informacionin e kërkuar në mënyrë të vazhdueshme nga ana e ERE, lidhur me realizimin e treguesve tekniko-ekonomikë dhe financiarë të shoqërive përgjatë vitit 2020. Sipas ERE-s, parashikimet e OSSH të paraqitura në kërkesën e aplikimit, nuk mund të merren për bazë për arsye se tashmë jemi në muajin e fundit të vitit 2020, ndaj çdo e dhënë e depozituar më herët ka humbur aktualitetin dhe nuk paraqet një pasqyrë reale të rrethanave të faktit.
Ndërkaq, sipas ERE-s, nga vlerësimet e kryera mbi të dhënat e vëna në dispozicion në kuadër të raportimeve periodike llogaritet se tarifat aktuale të shërbimit të shpërndarjes së energjisë elektrike, i mundësojnë OSSH-së të ardhura të mjaftueshme për mbulimin e shpenzimeve nga aktiviteti i licencuar. Rritja e tarifës së shpërndarjes do të ndikonte në çmimin fundor të energjisë për bizneset e dalë në treg të lirë energjie, pasi çmimi final reflekton edhe tarifën e OSSH-së, si një detyrim për shkak të përdorimit të linjave që normalisht menaxhohen nga ky dikaster. Për këtë arsye, gjatë konsultimeve të zhvilluara në muajin shkurt me grupet e interesit, bizneset argumentuan se kjo tarifë e rritur do të ndikonte në uljen e konkurrueshmërisë jo vetëm në tregun shqiptar, por edhe në drejtim të eksporteve.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.