ERRU ngre alarmin për vjedhjen e ujit – Bilanci/ 50% e ujit të prodhuar vidhet ose nënfaturohet, rritet uji pa të ardhura
Rreth 65% e ujit të prodhuar humbet në rrjetin e transmetimit dhe shpërndarjes, ndërkohë që nivelet e larta të vjedhjeve tregojnë se mirëmenaxhimi i shoqërive të ujësjellës kanalizimeve është imediat”. Alarmi ngrihet nga Enti Rregullator i Ujit, që ka publikuar Bilancin e Ujit për vitin 2020, sipas të cilit humbjet e dukshme, ku bëjnë pjesë pikërisht vjedhjet, nënfaturimet dhe lidhjet e paligjshme përbëjnë mesatarisht 48.9% të humbjeve të përgjithshme, ndërkohë që pjesa tjetër shkaktohet si pasojë e rrjeteve të amortizuar.
Sipas ERRU-së, krahasuar me vitin 2019, niveli i humbjeve nga lidhjet e paligjshme në transmetim dhe shpërndarje paraqet tendencë në përmirësim, por që është në vlera të papranueshme dhe i mbivlerësuar, çka tregon se procesi i eliminimit të tyre duhet të jetë në fokusin e çdo shoqërie. Paralelisht, të dhënat e mbledhura dhe të përpunuara vit treguan se niveli i “Ujit Pa të Ardhura” është rritur me 1.6%, duke arritur në 65.44%.
Në grupin e parë të shoqërive të ujësjellës-kanalizimeve, ku bëjnë pjesë ato shoqëri që janë më të shëndosha nga pikëpamja financiare, me nivele të larta, në drejtim të vjedhjeve, nën-faturimeve dhe lidhjeve të paligjshme paraqiten shoqëritë e UK në Shkodër, Fier, Vlorë dhe Durrës. Sa i takon Tiranës, ky tregues është në masën 41%.
Problem i pazgjidhur, sipas ERRU-së mbetet edhe mungesa e matësve në pikat kyçe të prodhimit të ujit. Në vitin 2020, sasia e ujit të prodhuar nga të gjitha shoqëritë UK është 309,887,138 m3, por prodhimi total matet në nivelin 57%, ndërsa pjesa tjetër prej 43% vlerësohet. Gjithashtu, ndonëse rezulton se prodhimi total u rrit me rreth 12.3 milion m3, faturimi total ka mbetur pothuaj i njëjtë me vitin 2019. Nga totali i sasisë së ujit të faturuar, Faturimi i Matur zë 75.5% e tij, pjesa tjetër faturohet aforfe.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.