ESM paguan Greqinë – I jep pjesën e mbetur të këstit të miratuar në Korrik
Fondi i shpëtimit i Eurozonës, ESM, vendosi të disbursojë 800 milionë euro për Greqinë, që është pjesa e mbetur e këstit të miratuar në datën 7 Korrik, në mënyrë që qeveria greke të paguajë detyrimet.
“Kjo është pjesa e mbetur e këstit të tretë të asistencës financiare të ESM, të miratuar më datë 7 Korrik 2017. Shuma do të disbursohet ndaj një llogarie të dedikuar për të shlyer detyrimet”, deklaroi Mekanizmi Europian i Stabilitetit.
Zyrtarët e ministrisë së Financave të Greqisë thanë se detyrimet shtetërore të Greqisë ndaj sektorit privat janë reduktuar me 1.5 miliardë euro, një shifër që e ka tejkaluar objektivin e caktuar prej 300 milionë euro.
Disbursimi do të mbështesë Greqinë që të vendosë ekonominë në një ritëm të qëndrueshëm të rritjes, që do të sjellë edhe përfundimin e suksesshëm të programit të shpëtimit të vendit në Gusht të 2018-ës.
Fondi i shpëtimit të Eurozonës shtoi se pas disbursimit të kësaj jave, mbështetja financiare e organizatës për Greqinë do të arrijë në 40.2 miliardë euro.
Qeveritë e Eurozonës kanë disbursuar deri më tani 182 miliardë euro për Greqinë, përfshirë shumën e miratuar këtë javë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.