Etiketa ushqimore të falsifikuara dhe thyerje rregullash për furrat e bukës/ AKU gjobit dhe bllokon 19 subjekte gjatë 24 orëve të fundit!

Trupat inspektuese të Drejtorive Rajonale të Autoritetit Kombëtar të Ushqimit kanë kryer 105 monitorime dhe kontrolle zyrtare për garantimin e sigurisë ushqimore, si edhe monitorime apo këshillime në kuadër të masave të shtuara për mospërhapjen e COVID -19.

Sipas njoftimit të AKU është marrë 1 masë administrative me “gjobë” në 1 subjekt me aktivitet “furrë buke” në Tiranë për mosrespektim të aktit normativ, për ndalimin e tregtimit të bukës së prerje në vlerën e 50 mijë lekëve si dhe janë dhënë 5 masa administrative “paralajmërim” në Shkodër për prani të mjeteve prerëse të bukës në ambientet e tregtimit deri në largimin e tyre brenda 24 orëve.

Gjithashtu sipas AKU ë qarkun e Vlorës dhe të Beratit në bashkëpunim institucional me organet kompetente të Policisë së Shtetit, janë bllokuar produkte ushqimore me etiketë të falsifikuar. Përkatësisht në 4 markete të qytetit të Vlorës janë bllokuar produkte ushqimore me etiketë të falsifikuar si dhe është bërë bllokimi i tyre në subjekte si provë për organet hetimore dhe tërheqjen e tyre nga tregu.

AKU njofton se në qarkun e Beratit janë kryer inspektime në 9 subjekte ushqimore ku në 5 prej tyre janë bllokuar një sasi produktesh ushqimore me etiketë të falsifikuar. Gjithashtu është kryer bllokimi i këtyre produkteve në subjekte, deri në tërheqjen e tyre nga tregu.

AKU do të vijojë kontrollet dhe nuk do të tolerojë asnjë tentativë abuzimi si dhe do të bashkëpunojë me këdo që zbaton ligjin dhe masat e marra në mbrojtje të shëndetit të konsumatorëve.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.