“Etja” për më shumë fitim – Shqiptarët, 550 milionë euro në fondet e investimit
Shqiptarët iu kanë besuar mbi 550 milionë euro fondeve të investimit.
Sipas të dhënave nga Autoriteti i Mbikëqyrjes Financiare, në fund të shtatorit 2017 totali i aseteve neto të këtyre fondeve arriti në 73.6 miliardë lekë.
Që nga fillimi i vitit, vlera e aseteve është rritur me 12.5%. Janë mbi 61 milionë euro që shqiptarët i kanë depozituar në fondet e investimeve gjatë nëntë muajve të parë të vitit të kaluar.
Zgjerimi i fondeve të investimit tregon një zgjerim të horizontit të individëve drejt instrumenteve financiare alternative.
Kjo është diktuar edhe nga epoka e normave tejet të ulëta të interesit në ekonomi. Shumë individë kanë kërkuar alternativa më fitimprurëse dhe kjo ka sjellë zgjerim të portofolit të këtyre fondeve.
Kjo është reflektuar në një stanjacion në rritjen vjetore të depozitave, që në fund të nëntorit 2017 kishin vlerë pothuajse të njëjtë me nëntorin 2016.
Në tregun shqiptar veprojnë tre fonde të licencuara investimesh, nga të cilat dy në lekë dhe një në euro.
Fondet në lekë mbizotërojnë me 80% të aseteve totale, por edhe fondi në euro, Raiffeisen Prestigj, ka arritur përmasa të konsiderueshme, me rreth 111 milionë euro aktive neto.
Për shkak të strukturës së portofolit të investimeve, fondi në euro aktualisht garanton kthime ndjeshëm më të larta për investitorët, krahasuar me fondet në lekë.
Nëse fondet në lekë investojnë pothuajse tërësisht në tituj të qeverisë shqiptare, fondi në euro ka një portofol më të larmishëm investimesh, çka sjell përfitime më të mëdha dhe vlerë më të lartë të aseteve neto për kuotë.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.