Euro, e qëndrueshme pranë 1.08 dollarë – Volum i ulët i shkëmbimeve tregtare, për shkak të festës së Pashkëve!
Euro e ka nisur javën në qëndrueshmëri dhe po tregtohet pranë 1.08 dollarëve, ndërsa jeni japonez ka prekur sërish nivelin më të ulët në 2 dekada përballë momedhës së gjelbër. Megjithatë, volumi i shkëmbimeve tregtare është i ulët, për shkak se shumica e tregjeve globale janë pushim, gjatë ditës së sotme, me rastin e Pashkëve.
Dollari vijon të mbështetet nga pritshëmritë se Rezerva Federale do të rrisë sërish normat e interesit, ndërsa euro po gjendet nën presion, pasi investitorët janë të paqartë se kur do të rriten interesat në Eurozonë. Muajin e kaluar, Rezerva Federale sinjalizoi disa rritje të normës bazë të interesit, gjatë këtij viti, për të mbajtur nën kontroll inflacionin, që gjendet në nivelin më të lartë në 40 vitet e fundit.
Ndërkohë, javën e kaluar, Banka Qendrore Europiane konfirmoi planet për të mbyllur programin e blerjes së bonove në tremujorin e tretë të këtij viti, por shtoi se nuk kishte një afat të qartë mbi rritjen e interesave. Lagarde tha se, politika monetare do të jetë fleksibël dhe mund të ndryshojë me shpejtësi. Që nga fillimi i marsit, jeni japonez është dobësuar me rreth 10% në raport me dollarin amerikan, ndërsa vetëm gjatë javës së kaluar humbi rreth 2% të vlerës.
Në tregun e kriptovalutave, bitcoin po tregtohet qëndrueshëm, në rreth 40 mijë dollarë, ndërsa ethereum në rreth 2900 dollarë.
Lidion Kulla / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.