Euro, në nivelin më të ulët në 5 vite – Gazprom njofton ndërprerjen e furnizimit me gaz për Poloninë dhe Bullgarinë!
Dollari amerikan ka vijuar të forcohet edhe në sesionin e sotëm, duke prekur nivelet më të larta që nga periudha përpara pandemisë dhe njëkohësisht pritet të realizojë muajin më të mirë që nga viti 2015.
Monedha e gjelbër vijon të mbështetet nga pritshmëritë se Rezerva Federale do të rrisë me gjysmë pikë përqindje normën bazë të interesit dhe nga parashikimet për ngadalësimin e ekonomive në Europë dhe në Kinë. Frika për sigurinë energjetike e ka rrëzuar euron drejt nivelit më të ulët në pesë vitet e fundit, pasi kompania ruse, Gazprom njoftoi se do të ndërpresë furnizimin me gaz për Poloninë dhe Bullgarinë.
Indeksi që mat ecurinë e dollarit amerikan, përballë gjashtë monedhave kryesore ndërkombëtare, u rrit deri në 102.4 në sesionin aziatik, niveli më i lartë që nga marsi i vitit 2020.
Gjatë këtij muaji, indeksi i dollarit amerikan është rritur me rreth 4%. Gjithashtu, në fokus të investitorëve janë edhe raportimet tremujore të korporatave në SHBA dhe në Europë. Në tregun e kriptovalutave, Bitcoin ka rënë drejt nivelit të 38 mijë dollarëve, ndërsa ethereum po tregtohet në rreth 2800 dollarë.
Lidion Kulla / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.