Euro rrit normat e interesit – FMN: Shqipëria e detyruar t`i mbajë më të larta
Ekonomitë e vogla, të hapura dhe me nivel të lartë euroizimi janë praktikisht të detyruara që t`i mbajnë normat e interesit më të larta se ç`duhet, thotë Fondi Monetar Ndërkombëtar në një studimi fundit, që i referohet ekskluzivisht rastit të Shqipërisë, si një vend me nivel të lartë të përdorimit të monedhave të huaja në ekonomi.
Ky është studimi i dytë i fondit në pak muaj për euroizimin, por kësaj radhe i fokusuar më së shumti te politikat e Bankës Qendrore të Shqipërisë.
Përfundimi i institucionit me bazë në Washington është që, ekonomi të tilla si ajo shqiptare janë të detyruara t’i mbajnë normat më të larta, pasi përndryshe, politikat monetare nuk do të mund të transmetoheshin dot në ekonomi. Diçka të tillë, fondi e nënvizon disa herë.
Kjo do të thotë se, praktikisht, niveli i lartë i euroizimit të ekonomisë shqiptare nxit normat më të larta të interesit, ndërkohë që ulja e nivelit të përdorimit të euros për rrjedhojë, duhet të nxisë edhe një politikë më pak konservatore në drejtim të normave të interesit nga ana e Bankës Qendrore.
Pak kohë më parë, Banka e Shqipërisë paraqiti planin për të ulur nivelin e euroizimit të ekonomisë me rreth 10%, aq sa këshillonte FMN.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.