Euro vazhdon të tregtohet e dobët / Rënia më e madhe mujore që prej vitit 2019 prej pandemisë në Evropë
Euro u tregtua poshtë 1.18 dollarë në nisje të Javës, ndërkohë që perspektiva e masave më të ashpra të karantinës në Francë dhe Gjermani, rëndoi tek perspektiva afat-shkurtër e ekonomisë evropiane.
Valuta e përbashkët i është drejtuar rënies më të madhe mujore që prej mesit të 2019-s, prej programit të dobët të vaksinimit dhe valës së re të infeksioneve, pavarësisht se investitorët kanë hapur kryesisht pozicione për blerje (long) ndaj valutës. Euro vazhdoi rënien, në 1.1774 dollarë në nisje të tregtisë, jo shumë larg nivelit të javës së kaluar prej 1.1762, që ishte më i ulëti në 4 muaj e gjysmë. Me bazë mujore, ka rënë me 2.3%, që është rënia më e madhe që prej Korrikut 2019.
Diçka që shton presionet tek valuta është zgjerimi i ndryshores së normave të interesit mes Gjermanisë dhe Shteteve të Bashkuara, me spread-in mes borxheve 10-vjeçare të dy vendeve që është zgjeruar në 200 pikë bazë (2%), nga 150 pikë bazë që ishte në nisje të vitit. Kjo ka ofruar mbështetje për valutën e gjelbër. Investitorët thonë se vëmendja do të qëndrojë te situata e virusit në Evropë, nëse masat e karantinës mund të frenojnë infeksionin dhe nëse ritmi i ngadaltë i vaksinimit merr vrull.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.