Eurobondi/ Rama, Denaj dhe Ahmetaj shpjegojnë detajet: “Një sukses i qeverisë dhe besim për Shqipërinë”

Kryeministri Edi Rama ka bërë një dalje publike përballë gazetarëve ditën e sotme së bashku me Ministren e Financave, Anila Denaj dhe ministrin e Rindërtimit, Arben Ahmetaj për të folur mbi daljen e Shqipërisë në tregjet huaja duke siguruar eurobondin në shumën 650 milionë euro.

Kryeministri njoftoi në ditën e djeshme se Shqipëria arriti një rezultat të shkëlqyer në tregje financiare, duke arritur normën e interesit më të ulët në rajon, që ishte në masën 3.5% dhe me afat maturimi 7 vite. Nga shefi i qeverisë dhe ministri Ahmetaj kjo është një besim që i bëhet stabilitetit të ekonomisë së vendit tonë.

“Kur vendi del në tregjet e kapitaleve është në një proces të hapur ku synimet jo gjithmonë përputhen me kërkesën e tregjeve. Atyre që thonë hë mo se borxh morët, ju kujtoj që çdo njeri që hyn në një sistem bankar nuk mjafton të duash të marrësh borxh por duhet të gjesh dhe ata që të japin borxh dhe duhet të kenë besim. Është vlerësim për librin e llogarive të vendit”, deklaroi kryeministri Edi Rama në konferencën e sotme.

Por përse do të përdoren këto para? Kryeministri Edi Rama foli për një plan Marshall 10-vjeçar me një shtrirje deri në vitin 2029, ndërsa investimet do të fokusohen te rindërtimi, rimëkëmbja ekonomike pas COVID-it, zgjerimi i ndihmës për personat në nevojë, por edhe rritjen e pagave.

Ministrja Denaj ka dhënë detaje të tjera se si Shqipëria arriti të operonte në tregjet ndërkombëtare, duke treguar edhe ofertat që u morën:

“Kanë qenë 190 investitorë, që në tregjet ndërkombëtare kanë ofruar mbi 4 herë vlerën që ne kemi kërkuar. Financimi i siguruar nga eurobondi do të përdoret për të financuar eurobond të marrë më herët dhe për të plotësuar nevojat [për financim në vitin 2020. Investitorët e huaj duan të investojnë në Shqipëri Ata kanë besim tek qeveria.”

 Ministri Ahmetaj ka theksuar rëndësinë që eurobondi tregoi për besimin ndaj autoriteteve të qeverisë shqiptare, duke e krahasuar edhe me Konferencën e Donatorëve për tërmetin, ku Shqipëria arriti të thithë rreth 1.15 mld euro të përbëra nga grante, projekte dhe hua.

 “Procesin e eurobondit do ta rris me një proces të rritjes të Shqipërisë dhe qeverisë shqiptare. 17 shkurti tregoi besimin e komunitetit ndërkombëtar në mbështetje të Shqipërisë dhe shqiptarëve për të zhdukur pasojat e tërmetit, ndërsa qershori ishte besim edhe ndaj autoriteteve. Më 2010 na tregtuan me 11 përqind një eurobond që nxorëm. Nuk na trajtuan me 3.5 për qind sepse nuk kishin besim tek autoritetet. BB nuk jepte borxhe sepse nuk kishim besim tek autoritetet.  Dje na kanë vlerësuar autoritet me risk zero.

Kjo tregon një besim të madh tek qeveria dhe autoritetet e Shqipërisë nga të huajt. Falë reformave, Shqipëria është bërë me risk. Maqedonia e Veriut është 2B,ndërsa ne jemi B. Nuk është borxh në traditë të borxhit. Të gjitha shtetet dalin në treg. Të gjitha shtetet dalin në treg e nuk trajtohen të gjitha njësoj. Eurobondi do të përdoret për rritje të pagave në sektorë të ndryshëm, për rritje të pensioneve, për projektet që kemi etj.”- u shpreh z.Ahmetaj. 

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.