Eurodeputetët kërkesë për von der Leyen: Ballkani Perëndimor duhet të përfshihet në skemën e autorizimit të eksportit të pajisjeve mjekësore BE +
Anëtarët e grupeve të ndryshme në Parlamentin Europian i kanë dërguar një letër të përbashkët Presidentit të Komisionit Europian, Ursula von der Leyen duke kërkuar që vendet e Ballkanit Perëndimor të përfshihen në një skemë të kufizimeve të eksportit të pajisjeve mjekësore dhe të prokurimit të përbashkët të mallrave që kanë lidhje me krizën.
Anëtarët e Partisë Popullore uvropiane (EPP), të Gjelbërit dhe Liberalët (“Rinovoni Evropën”) në Parlamentin Europian i kanë dërguar një letër Presidentit të Komisionit Europian ku thuhej se koordinimi europian i pandemisë COVID-19 duhet të përfshijë gjithashtu vendet e Ballkanit Perëndimor.
Ata paralajmëruan se kufizimet e vendosura të eksporteve në pajisjet mjekësore mund të sjellin pasoja serioze për rajonin. “Sistemet shëndetësore në këto vende janë përgjithësisht më të dobëta, kjo është arsyeja pse vendet e Ballkanit Perëndimor kanë nevojë për mbrojtje të forcuar nga ana e BE-së. Prandaj, ne ju bëjmë thirrje që të përfshini të gjashtë vendet e Ballkanit Perëndimor në skemën e autorizimit të eksportit BE + që aktualisht mbulon vendet anëtare të BE-së, si dhe Islandën, Lihtenshtajnin, Norvegjinë, Zvicrën dhe Mbretërinë e Bashkuar “, kanë shkruar parlamentarët e BE-së.
Sipas tyre, vendet e Ballkanit Perëndimor gjithashtu duhet të jenë në gjendje të marrin pjesë në prokurimin e përbashkët të mallrave që kanë të bëjnë me krizën. “Njerëzit e Ballkanit Perëndimor ndjehen dhe jetojnë si europianë. BE ka vënë vazhdimisht procesin e zgjerimit në pritje. Sidoqoftë, këto vende na kanë mbështetur për vite me radhë për migracionin dhe fushat e tjera. Tani është radha jonë të tregojmë solidaritet ”, kanë shkruar eurodeputetët.
Eurodeputetët Lukas Mandl (EPP), Viola von Cramon-Taubadel (Greens), Raportues për Kosovën, Ilhan Kyuchyuk (“Rinovoni Europën”), raportues për Maqedoninë e Veriut dhe Andrey Kovatchev (EPP) përfunduan në një letër drejtuar Ursula von der Leyen se pandemia prek të gjithë dhe se solidariteti i të gjitha vendeve europiane mund të shpëtojë jetë. (europeanwesternbalkans)
E . S / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.