Eurogrupi zgjedh presidentin e ri. Donohoe merr detyrën gjatë recesionit më të keq në histori
Ministrat e financave të Eurozonës zgjodhën këtë javë irlandezin, Paschal Donohoe, për të drejtuar Eurogrupin, një detyrë që do të kërkojë drejtimin e ekonomive të goditura nga koronavirusi tek rimëkëmbja. Donohoe u zgjodh pas raundit të 2 të votimeve, ku mposhti spanjollen Nadia Calvino dhe homologun belg, Pierre Gramenga. Ai do të marrë postin nga presidenti që po largohet, Mario Centeno më 13 Korrik dhe do të shërbejë për 2 vite e gjysmë.
“Ndërsa nis mandatin si president i Eurogupit, jam plotësisht në vetëdije për shqetësimet e qytetarëve të Europës mbi ekonomitë kombëtare, ekonominë europiane si dhe të ardhmen e tyre, përfshirë vendet e punës. Gjatë mandatit tim, që do marr nga kolegu dhe miku im Mario, unë do të bashkëpunoj me të gjithë anëtarët e Eurogrupit për të parë se si Euro mund të jetë themeli i një kundërpërgjigjeje ndaj sfidave të tilla të mëdha.”
Donohoe, i njohur për qasjen e tij të matur fiskale, i është shmangur kërkesave për ulje të mëdha tatimore dhe rritje të shpenzimeve, duke arritur sufiçitin e parë buxhetor të Irlandës në 1 dekadë. Ai është gjithashtu kundër taskës së BE ndaj firmave dixhitale. Donohoe do të duhet të drejtojë 19 vendet e Eurozonës jashtë recesionit më të keq në histori, ndërkohë që Komisioni pret një tkurrje ekonomike me 8.7% këtë vit. Ai do të duhet të ndërmjetësojë mes bllokut jugor, që kërkon zbutjen e rregullave fiskale dhe frontit verior, të drejtuar nga Hollanda, që preferojnë rikthimin e kontrolleve ndaj buxheteve kombëtare. Kërkesat për një deficit fiskal poshtë 3% të PBB dhe për ulje të borxhit, janë pezulluar gjatë pandemisë. Donohoe tha se do përpiqet të ndërtojë “ura” mes të gjithë vendeve të Eurozonës, duke i angazhuar në mënyrë aktive të gjithë. Ai shtoi se politikat fiskale në Eurozonë do rikthehen në normalitet vetëm pasi rimëkëmbja të ketë përfunduar.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.