Europa, humbësja e madhe – Ekspertët paralajmërojnë mbi përballjen tregtare SHBA-Kinë
Europa do të jetë humbësja e madhe në luftën tregtare mes Shteteve të Bashkuara të Amerikës dhe Kinës, dy ekonomive më të mëdha të botës, paralajmërojnë ekspertët. Europa është shumë e ndarë për të korrur përfitime nga ky moment tensionesh në arenën ndërkombëtare.
Shtetet e Bashkuara kërkojnë që të eksportojnë shërbimet e tyre në Kinë. Eurozona, dhe Franca sidomos, nuk janë të organizuara si duhet për të eksportuar shërbimet e tyre dhe veçanërisht shërbimet financiare, pasi në Europë nuk ka një treg të përbashkët shërbimesh, e për rrjedhojë është shumë e vështirë për europianët që të dalin me një politikë të unifikuar në mënyrë që të negociojnë me Kinën dhe Shtetet e Bashkuara të Amerikës.
Në një kohë që Shtetet e Bashkuara nuk kanë ndërmend ta humbasin pozicionin e tyre si lider global, Europa duket se do të jetë pikërisht humbësja e madhe e kësaj përplasje, sqarojnë ekspertët.
Shtetet e Bashkuara dhe Kina kanë përshkallëzuar tensionet mes tyre, ndërkohë që javën e kaluar dështuan edhe bisedimet për të arritur një marrëveshje tregtare.
Donald Trump ka pasur përplasje edhe me Europën por i ka lënë në pritje vendimet e mëdha.
Nga ana tjetër, në Bashkimin Europian së fundmi janë shtuar së tepërmi zërat për një bashkim më të madh, pasi vetëm në këtë mënyrë mund të luftohet proteksionizmi i Donald Trump.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.