Europa vlerëson bankat shqiptare – KE: Konsolidimi po vazhdon, kanë rënë normat e interesit për kreditë
Në raportin më të fundit, atë të tremujorit të parë për vendet kandidate, Bashkimi Europian mban të njëjtat projeksione me vjeshtën, e po ashtu mban të njëjtën qasje ndaj ekonomisë shqiptare në tërësi.
Sa i përket sektorit financiar në Shqipëri ndërkohë, Komisioni Europian thotë se “konsolidimi i sektorit bankar ka vijuar edhe përgjatë muajve të parë të këtij viti, me numrin e bankave që ka zbritur nga 16 në 13, në Mars të 2019-ës”. “Norma e mjaftueshmërisë së kapitalit në sektorin bankar mbetet e qëndrueshme, në 18.2%”, thuhet më tej. Sa i përket kredive jo-performuese, Brukseli zyrtar sqaron se rënia ka vijuar, deri në 11.3% në Janar të këtij viti.
Edhe kreditimi ndaj sektorit privat jo-financiar ka vijuar rimëkëmbjen gjatë tremujorit të parë të vitit, thotë me tej Komisioni Europian.
Ndërkohë, vë theksin te kreditimi ndaj familjeve, në rritje, por me një hap më të ngadaltë se më parë. Normat e interesit ndërkohë, si për biznesin, ashtu edhe për familjet vlerësohet në rënie të lehtë. Për familjet norma mesatare e interesit vlerësohet të ketë qenë në 7.1% ndërsa tani ka rënë në 6.9%. Për sipërmarrjen, ka qenë në 6.9% dhe tashmë fiksohet në 6.5%, thotë Brukseli. Edhe rritja e depozitave, me 1.1% vlerësohet si një zhvillim pozitiv.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.