”EUROPOL” tashmë me një zyrë edhe në Tiranë- Çfarë synon ky bashkëpunim me Policinë e Shtetit?!
Në Drejtorinë e Përgjithshme të Policisë Shtetit, është zhvilluar ceremonia e hapjes së zyrës së Oficerit Ndërlidhës të EUROPOL. Të pranishëm në këtë takim ishin Ministri i Brendshëm, Ambasadori L. Soreca, Drejtorja Ekzekutive e EUROPOL-it Catherine de Bolle, ambasadorë dhe oficerë ndërlidhës të vendeve partnere. Gjatë ceremonisë së zhvilluar, drejtori i Përgjithshëm i Policisë së Shtetit, Ardi Veliu, është shprehur se bashkëpunimi me partnerët dhe me agjencitë ligjzbatuese të vendeve partnere për Policinë e Shtetit është një ndër tre prioritetet kryesore të punës së saj.
‘’Ne jemi të vetëdijshëm dhe të bindur se lufta kundër krimit të organizuar nuk mund të ketë sukses sado e zhvilluar të jetë një organizatë policore në rast se nuk bashkëpunon me partnerët. Krimi i organizuar është i ndërlikuar, i shtrirë në hapësirë dhe s’njeh kufij, ngjyrë apo kombësi dhe për këtë, bashkëpunimi është domosdoshmëri për të përmbushur detyrën më kryesore, krijimin e një mjedisi të sigurt për qytetarët, biznesin dhe turistë.’’ – ka deklaruar Veliu.
EUROPOL-i, si një organizatë e Bashkimit Europian për zbatimin e ligjit, synon të përmirësojë efektivitetin dhe bashkëpunimin ndërmjet agjencive ligjzbatuese të shteteve anëtare, për parandalimin dhe luftën kundër krimeve të rënda, krimit të organizuar ndërkombëtar dhe terrorizmit.
Në këtë kontekst, asistenca e EUROPOL-it, në Policinë e Shtetit, synon të përmirësojë metodat, për të bërë të mundur luftën kundër krimit të organizuar, si një nga problemet themelore në vendin tonë, synon të luftojë terrorizmit ndërkombëtar, trafikun e lëndëve narkotike dhe migracionit të paligjshëm.
Marrëveshja e parë e bashkëpunimit mes Shqipërisë dhe Europol, është nënshkruar në vitin 2013 në Hagë. Ndërsa marrëveshja për krijimin e zyrës së oficerit ndërlidhës, u nënshkrua në vitin 2018, mes Drejtorit të Policisë Ardi Veliut dhe Zëvëndës Drejtorit Ekzekutiv të Operacioneve, Wil van Gemert. Vitin e kaluar Shqipëria mori pjesë në 8 operacione ndërkombëtare, ndërsa në gjashtëmujorin e parë të këtij viti, ka bashkëpunuar në 12 operacione.
Elefteria Zguri/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.