Eurosig do të riblejë Insig Jetë – Operacioni do të shqyrtohet nga Bordi i AMF javën e ardhshme
Javën e ardhshme, Bordi Drejtues i Autoritetit të Mbikëqyrjes Financiare (AMF) pritet të miratojë blerjen e kompanisë e sigurimit të jetës, Insig Jetë, nga Eurosig. Palët kanë vendosur të revokojnë kontratën e vitit 2017. Në vitin 2016, Eurosig fitoi garën për privatizimin e Insig, me një ofertë prej 2.2 miliardë lekësh ose rreth 16 milionë euro me kursin e atëhershëm. Një vit pas privatizimit, Eurosig vendosi ta shesë aktivitetin e sigurimit të jetës.
Vlera e shitjes në paketës së aksioneve kishte qenë 3.5 milionë euro ose 473.3 milionë lekë. Megjithatë, marrëveshja parashikonte që pagesa në momentin e nëshkrimit të kontratës do të ishte vetëm 20 milionë lekë, ndërsa diferenca do të paguhej brenda 24 muajve, pasi të kryhej një auditim i thelluar i llogarive të kompanisë.
Mbështetur në të dhënat e Autoritetit të Mbikëqyrjes Financiare, për 6-mujorin 2017, Insig Jetë zotëronte 17% të primeve të shkruara bruto në tregun e sigurimit të jetës, për një vlerë totale prej 83 milionë lekësh.
Ersuin Shehu / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.