Eurozona, me obligacione “Panda” – Portugalia, vendi i parë që emeton borxh në tregun kinez
Portugalia është kthyer në vendin e parë të Eurozonës që emeton obligacione të denominuara në juanin kinez. Këto tituj borxhi, që njihen me emrin “Panda”, janë borxh i denominuar në juan të ofruara nga një emetues sovran i huaj. Shitja do të ndërmerret këtë javë. Portugalia lajmëroi javën e kaluar objektivin për të shitur 289 milionë dollarë (2 miliardë juan) borxh, me afat maturimi prej 3 vitesh.
Këto obligacione panda nuk janë të parat në Bashkimin Europian, ndërkohë që Polonia ka emetuar tituj qeveritar në tregun kinez në vitin 2016 dhe Hungaria në vitin 2018. Ministri i Financave në Portugali, Mario Centeno, tha se emetimi përbën një hap pozitiv në manaxhimin e borxhit të jashtëm të Portugalisë në afat-mesëm. Shitja e borxhit do të bëjë që Portugalia të zgjerojë bazën e investitorëve, sipas Centeno. Portugalia është një nga vendet europiane me nivelin më të lartë të investimeve kineze.
Vendi kaloi një paketë të shpëtimit ndërkombëtare mes viteve 2011 dhe 2014, gjatë kulmit të krizës së borxheve sovrane në Eurozonë. Që prej atëherë, ekonomia e Portugalisë është kthyer në rritje dhe agjencitë e vlerësimit të kreditit janë bërë më optimiste për vendion. Javën e kaluar, Fitch ratings ktheu perspektivën e Portugalisë në pozitive, nga e qëndrueshme, duke hapur mundësinë e rritjes së vlerësimit të kreditit më vonë gjatë vitit.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.