Eurozona në “duart” e Macron – Rajoni po rimëkëmbet, por e ardhmja varet nga 7 maji
Emmanuel Macron, pavarësisht se vetëm 39 vjeç, është kthyer në faktorin përcaktues të së ardhmes së Eurozonës.
Një anketë e fundit e Reuters, tregon se, rimëkëmbja ekonomike e Eurozonës do të jetë e qëndrueshme por modeste në vitet në vijim, dhe se do të varet nga rezultati i kandidatit të pavarur Emmanuel Macron në zgjedhjet presidenciale në Francë.
Anketa e Reuters është zhvilluar me ekspertët, investitorët, ekonomistët dhe sipërmarrësit.
Si rrallëherë më parë, pasiguritë politike mbizotërojnë, dhe me rastin e Francës nuk kishte si të ndodhte ndryshe. Franca është ekonomia e dytë më e madhe e Eurozonës, dhe rrezikon të prodhojë surpriza aspak të këndshme në të dy raundet e zgjedhjeve presidenciale.
“Fitorja e Marine Le Pen do të gjeneronte një periudhë të gjatë destabiliteti dhe pasigurie“-shprehen ekspertët.
Të gjitha projeksionet dhe parashikimet janë të bazuara mbi hamendësimin se, zgjedhjet në Europë nuk do të prodhojnë asnjë qeveri që ka për synim të nxjerrë vendin nga Eurozona.
Të pyetur se, cili prej kandidatëve do të ishte më i përshtatshmi për rritjen ekonomike të Francës, 30 nga 51 zgjedhin Macron dhe 19 Francois Fillon. Asnjë nuk zgjedh Marine Le Pen.
Ekspertët dhe aktorët e tregut projektojnë një rritje ekonomike të rajonit me 0.4% në çdo tremujor, ndërkohë që projeksionet vjetore flasin për një normë në 1.7%.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.